سولتۇستىك قازاقستانعا قىتايدان ءداندى داقىلداردىڭ 30 دان استام سۇرىپى جەتكىزىلدى
پەتروپاۆل. KAZINFORM - سولتۇستىك قازاقستان وبلىسىندا اگرارلىق سالاداعى ءىرى حالىقارالىق جوبالاردىڭ ءبىرى جۇزەگە اسىپ جاتىر، ناتيجەسىندە زاماناۋي اگرارلىق-عىلىمي كەشەن پايدا بولماق.
بىلتىر Kozybayev University قىتاي حالىق رەسپۋبليكاسىنىڭ حىنان اۋىل شارۋاشىلىعى ينۆەستيتسيالىق توبىمەن بىرلەسىپ، قىزىلجار اۋدانىندا قازاقستان- قىتاي اگروتەحنولوگيالار جانە ەكسپورتتى دامىتۋ تەحنوپاركىن قۇرۋ جوباسىن باستادى.
Kozybayev University باسپا ءسوز قىزمەتىنىڭ مالىمەتىنشە، وسى جوبا اياسىندا قىتايلىق سەرىكتەس كورپوراتسيانىڭ دەلەگاتسياسى كەلدى. كومپانيا وكىلدەرى وبلىس باسشىلىعىمەن كەزدەسىپ، ۋنيۆەرسيتەتكە بارىپ، اتقارىلعان جۇمىستى قورىتىندىلادى جانە الداعى جوسپارلاردى ايقىندادى. سونىمەن قاتار، سورتتاردى زەرتتەۋ جانە سەلەكسيالاۋ بويىنشا عىلىمي جۇمىستاردىڭ جوسپارى ناقتىلانىپ، بولاشاق دەمونستراتسيالىق پاركتىڭ قۇرىلىمدىق جوباسى ازىرلەنىپ، تىركەۋ راسىمدەرى جۇرگىزىلىپ جاتىر. شەتەلدىك ماماندار وزدەرىمەن قىتايدان بيداي، جۇگەرى جانە سويانىڭ 32 سورتىن، جالپى سالماعى 177 ك گ ءداندى داقىلداردى اكەلدى.
- س ق و اكىمدىگىنىڭ قولداۋىنىڭ ارقاسىندا ۋنيۆەرسيتەتپەن بىرلەسكەن جۇمىس جۇيەلى تۇردە جولعا قويىلعان. قىتاي تاراپىنان حىنان پروۆينتسياسىنداعى جوعارى وقۋ ورىندارى مەن عىلىمي-زەرتتەۋ ينستيتۋتتارىمەن كەلىسىمدەر جاسالىپ، قازاقستانعا بيدايدىڭ 12، جۇگەرىنىڭ 18 جانە سويانىڭ 2 سورتى جەتكىزىلگەن. الداعى كەزەڭدە دەمونستراتسيالىق پارككە ارنالعان جەر تەلىمىن زەردەلەپ، جەرگىلىكتى ماماندارمەن بىرلەسكەن جۇمىس جوسپارىن ناقتىلاۋ كوزدەلىپ وتىر، - دەيدى باس ديرەكتورى تيان جيانۋەي.
بولاشاق دەمونستراتسيالىق پارك جالپى قۇرىلىس اۋماعى شامامەن 35 مىڭ شارشى مەتردى الاتىن زاماناۋي اگرارلىق- عىلىمي كەشەن رەتىندە جوسپارلانعان. ونىڭ قۇرامىنا زەرتحانالار، جىلىجاي كەشەندەرى، اۋىل شارۋاشىلىعى ونىمدەرىن وڭدەۋ نىساندارى، قويما جانە لوگيستيكالىق ينفراقۇرىلىم، اكىمشىلىك عيماراتتار مەن جاتاقحانالار كىرەدى.
حىنان اۋىل شارۋاشىلىعى ينۆەستيتسيالىق توبى «ەگىستىكتەن داستارحانعا دەيىن» قاعيداتى بويىنشا جۇمىس ىستەيتىن تولىق سيكلدى مەملەكەتتىك كومپانيا. ول استىق ساتىپ الۋ، ءسۇت جانە ەت ونىمدەرىن وڭدەۋ، لوگيستيكالىق تىزبەكتەردى دامىتۋ، ساپانى باقىلاۋ، زاماناۋي اگروتەحنولوگيالاردى ەنگىزۋ، سونداي-اق ەكسپورت- يمپورت وپەراتسيالارىن اتقارادى.
قازاقستانداعى تەحنوپارك جوباسىنا 10 ميلليون ا ق ش دوللارى شاماسىندا ينۆەستيتسيا قۇيماق.
جوبانىڭ ءوڭىر ءۇشىن ستراتەگيالىق ماڭىزى زور. ول تىكەلەي شەتەلدىك ينۆەستيتسيا تارتۋعا، جاڭا جۇمىس ورىندارىن اشۋعا جانە وندىرىستىك كلاستەرلەر قالىپتاستىرۋعا مۇمكىندىك بەرمەك. اسىرەسە تۇقىم شارۋاشىلىعىن دامىتۋعا، زاماناۋي اگروتەحنولوگيالاردى ەنگىزۋگە، اۋىل شارۋاشىلىعى ونىمدەرىن وڭدەۋگە جانە جىلىجاي شارۋاشىلىعىن كەڭەيتۋگە جاعداي جاساماق. سونىمەن قاتار، قىتاي نارىعىنا تۇراقتى ەكسپورتتىق ارنانىڭ قالىپتاسۋى سولتۇستىكقازاقستاندىق ءونىمنىڭ باسەكەگە قابىلەتتىلىگىن ارتتىرۋعا ىقپال ەتەدى.
ۋنيۆەرسيتەت وكىلدەرىنىڭ ايتۋىنشا، ەكونوميكالىق تيىمدىلىكتەن بولەك، بۇل جوبا ۋنيۆەرسيتەتتىڭ عىلىمي-ءبىلىم بەرۋ الەۋەتىن كۇشەيتىپ، فەرمەرلەر، ستۋدەنتتەر مەن اگروونەركاسىپ سالاسىنىڭ ماماندارى ءۇشىن زاماناۋي تاجىريبەلىك الاڭ قالىپتاسپاق. بولاشاقتا تەحنوپارك وڭىردەگى اۋىل شارۋاشىلىعىنىڭ دامۋىنا سەرپىن بەرەتىن جەتەكشى كۇشتىڭ بىرىنە اينالىپ، حالىقارالىق اگروتەحنولوگيالىق ىنتىماقتاستىقتى نىعايتۋعا جول اشادى.
بۇعان دەيىن قازاقستان مەن تۇركيا عالىمدارى اۋىل شارۋاشىلىعى سالاسىندا بىرلەسىپ زەرتتەۋ جۇرگىزىپ جاتقانىن جازعان ەدىك.
اۆتور
اقەركە داۋرەنبەك قىزى
