سولتۇستىك قازاقستان وبلىسىندا اسكەر قاتارىنا الىنۋى ءتيىس 600 جىگىتتىڭ جۇرگەن جەرى بەلگىسىز
پەتروپاۆل. KAZINFORM - سولتۇستىك قازاقستان وبلىسىندا بيىل كوكتەمدە 500-گە جۋىق جىگىت اسكەر قاتارىنا الىنباق. الايدا بۇل جوسپار ورىندالماۋى مۇمكىن.
س ق و قورعانىس ىستەرى جونىندەگى دەپارتامەنت وڭىرلىك كوممۋنيكاتسيالار قىزمەتىندە كوكتەمگى اسكەرگە شاقىرۋ ناۋقانى بويىنشا اقپارات بەردى.
كوكتەمگى اسكەرگە شاقىرۋ 1-ناۋرىز باستالدى. بۇگىنگە دەيىن 13 جىگىت شىعىس قازاقستان وبلىسىنا ازاماتتىق بورىشىن اتقارۋعا اتتانىپ كەتتى.
«جىلدا ءبىزدىڭ جىگىتتەر اسكەري قىزمەت وتكەرۋ ءۇشىن ەلىمىزدىڭ بارلىق وڭىرلەرىنە جىبەرىلەدى. قازىرگى ۋاقىتتا جوسپارلى تۇردە اسكەري كوماندالاردى قالىپتاستىرۋ جانە جىبەرۋ پروتسەسى ءجۇرىپ جاتىر. وسى جىلدىڭ 8-ناۋرىزىندا ءبىر اسكەري كوماندا قۇرىلىپ، شەكارا قىزمەتىنە جىبەرىلدى. ماۋسىمنىڭ بىرىنە دەيىن 480 ادامدى اتتاندىرۋىمىز كەرەك»، - دەيدى س ق و قورعانىس ىستەرى جونىندەگى دەپارتامەنت باستىعىنىڭ ورىنباسارى مارات كاريموۆ.
الايدا ءوڭىر ءتيىستى جوسپاردى ورىنداي الماۋى مۇمكىن. قازىرگى ۋاقىتتا اسكەرگە شاقىرىلۋى ءتيىس 600 جىگىتتىڭ جۇرگەن جەرى بەلگىسىز. مامانداردىڭ ايتۋىنشا، ولاردىڭ باسىم بولىگى شەتەل اسقان، ءبىرى وقىپ جاتسا، ەندى ءبىرى جۇمىسقا ورنالاسقان.
سونداي-اق، جاستاردىڭ اراسىندا كوز اۋرۋلارى كوبەيگەن. بۇل قازىرگى گادجەتتەردىڭ اعزاعا كەرى اسەرى. جىگىتتەر مەديتسينالىق كوميسسيادان جۇرەك-قان تامىرلارى اۋرۋلارى بويىنشا دا وتە المايتىن بولعان. وعان ەنەرگەتيكالىق سۋسىنداردى كوپتەپ پايدالانۋ سەبەپ.
ال اسكەرگە بارۋدان جالتارعاندارعا قىلمىستىق جانە اكىمشىلىك جاۋاپكەرشىلىك قاراستىرىلعان. شاقىرۋ بويىنشا اسكەري كوميسسارياتقا كەلمەگەندەرگە 5 ا ە ك مولشەرىندە ايىپپۇل سالىنادى. مەديتسينالىق كوميسسيادان سەبەپسىز وتپەسە ەسكەرتۋ الادى نەمەسە 3 ا ە ك مولشەرىندە ايىپپۇل سالىنادى.
اسكەرگە بارۋدان نەگىزسىز جالتارعان جاعدايدا اسكەرگە شاقىرىلۋشى 1000 ا ە ك مولشەرىندە ايىپپۇل تولەيدى نەمەسە تۇزەۋ جۇمىستارىنا جەگىلەدى. بۇل دا ناتيجە بەرمەگەن جاعدايدا جالتارۋشى 1 جىلعا دەيىن ناقتى مەرزىمگە باس بوستاندىعىنان ايىرىلۋى مۇمكىن.
اۆتور
اقەركە داۋرەنبەك قىزى
