سولتۇستىك قازاقستان وبلىسى اۋىلدارىنا ەلىكتەردىڭ ارتىن الا قاباندار كىرە باستادى

پەتروپاۆل. KAZINFORM - سولتۇستىك قازاقستان وبلىسى شال اقىن اۋدانى بالۋان اۋىلىنا ءبىر توپ قابان كىردى. جابايى جانۋارلاردى ۇيالى تەلەفونعا ءتۇسىرىپ العان تۇرعىندار، بەينەجازبامەن الەۋمەتتىك جەلىدە ءبولىسىپ جاتىر.

جابايى جانۋارلاردىڭ ەلدى مەكەندەرگە كوپتەپ كىرۋىن ماماندار ءتۇسىندىردى.

«ەلىكتەردىڭ ەلدى مەكەندەرگە كىرۋى ءبىزدىڭ ءوڭىر ءۇشىن ايتارلىقتاي ەرەكشە جايت ەمەس. رەسەيدىڭ ومبى، قورعان وبلىستارىندا دا جابايى جانۋارلاردىڭ كوشەگە ءجۇرۋى كوپتەپ كەزدەسەدى. اقمولا وبلىسىندا دا وسىعان ۇقساس جاعداي. بۇل - قولايسىز اۋا رايىنا بايلانىستى. سولتۇستىك وڭىرلەردە قار جامىلعىسى قالىڭداسىمەن-اق، كەي جىلدارى قىستا جاڭبىر جاۋادى، تۇياقتى جانۋارلارعا وزدىگىنەن قورەك تابۋ قيىندىق اكەلەدى. سوندىقتان ەلىكتەر ازىق ىزدەپ كەتەدى. رەسەيدىڭ ەلىكتەرى مۇندايدا بىزگە اۋادى. ال جولدا ەلدى مەكەندەرگە دە كىرەدى. ءبىزدىڭ قىزمەتتەر بيىلعى قىستا تەك پەتروپاۆلدان عانا 20 دان استام ەلىكتى ۇستاپ، ءومىر سۇرەتىن تابيعي ورتاسىنا جىبەردى»، - دەيدى س ق و ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ ءبولىم جەتەكشىسى ولەگ بەسپالوۆ.

ماماننىڭ ايتۋىنشا، جاعداي باقىلاۋدا. جالپى وبلىس اۋماعىندا بىرنەشە اڭشىلىق شارۋاشىلىق بار.

ولار ءوز اۋماقتارىنداعى جابايى جانۋارلاردى قىس ۋاقىتىندا قوسىمشا قورەكتەندىرۋگە مىندەتتەلگەن.

«قاباندار بويىنشا دا سول جاعداي. قار قالىڭ، جەمازىق تابۋ قيىنداعان. الەۋمەتتىك جەلىدە تاراعان سوڭعى روليككە قارايتىن بولساق، بۇل اۋىل از قونىستانعان، ساناۋلى ءۇي عانا قالعان. سوندىقتان ءتۇز تاعىلارى ەشقانداي قورقىنىشسىز اۋىلدى باسىپ وتەدى. ادامداردان قورىقپايدى دەپ جاتادى. ارينە، قورىقپايدى، ويتكەنى ولار اداممەن ءبىرىنشى رەت كەزدەسىپ تۇر، ودان كەلەر قاۋىپتى بىلمەيدى. ال قاباندارعا جاقىنداۋدىڭ قاجەتى جوق. ولار اگرەسسيۆتى جانۋارلار قاتارىندا. سونداي-اق ولاردى اتۋعا، اۋلاۋعا تىيىم سالىنعانىن ەسكەرتەمىن، قىلمىستىق جاۋاپكەرشىلىك بار. 1,3 ميلليون تەڭگە مولشەرىندە شىعىننىڭ ورنىن تولتىرادى»، - دەيدى ولەگ بەسپالوۆ.

س ق و-دا سوڭعى ۋاقىتتا الەۋمەتتىك جەلىدە «قاسقىر كوردىك، قاسقىر اتتىق» دەگەن جازبالار دا كوبەيدى.

«بىلتىر اقپان- ناۋرىز ايلارىندا جابايى جانۋارلاردىڭ ەسەبىن جۇرگىزدىك. قاسقىر تىركەلمەدى. ءبىراق ءبىز قاسقىر بار باسقا وبلىستارمەن شەكارالاس جاتىرمىز، سوندىقتان ولاردىڭ پايدا بولۋى مۇمكىن. ورمانداردا قاسقىرلارعا قورەك جەتكىلىكتى، سوندىقتان ولاردان ادامدارعا كەلەر قاۋىپ شامالى»، - دەيدى ولەگ بەسپالوۆ.

س ق و-دا سوڭعى ەسەپ بويىنشا قازىرگى ۋاقىتتا 20 مىڭ ەلىك، 3 مىڭ دوڭىز بار.

 

اۆتور
اقەركە داۋرەنبەك قىزى