سوعىس ارداگەرى زۇلقارناي سەيىتوۆ 103-كوكتەمىن قارسى الادى

استانا. KAZINFORM - سوعىس ارداگەرى زۇلقارناي سەيىتوۆ بيىل جەڭىستىڭ 80 جىلدىق مەرەيتويىن قارسى الادى. كوكتەم شىعا قارت مايدانگەر 9-مامىردى اسىعا كۇتەدى. ول ءۇشىن بۇل كۇننەن ارتىعى جوق.

جەڭىس كۇنىن بەرليندە قارسى العان. سول كەزدىڭ ءاربىر ءساتى الىگە دەيىن كوز الدىندا. «ونى ۇمىتۋ مۇمكىن ەمەس. سودان بەرى تالاي باقىتتى شاقتى باستان وتكەردىم. ءبىراق «سوعىس ءبىتتى» - دەگەن جالعىز اۋىز ءسوزدى ەستىگەندەگى قۋانىشتى ايتىپ جەتكىزۋ مۇمكىن ەمەس»، - دەيدى قاريا.

ارداقتى ارداگەر قازىر الماتىدا تۇرادى. 1941 -جىلى زۇلقارناي سەيىتوۆ 9-سىنىپتى ەندى بىتىرگەن ەدى. سول جىلدىڭ قاراشاسىندا مەكتەپتى اياقتاماي ءوزى سۇرانىپ، مايدانعا اتتانادى. الدىمەن جاس جاۋىنگەر تانك جويۋدىڭ ءادىسىن وقىپ كۋرستان وتەدى. قارۋ ۇستاپ، ءيىسشىل يتتەرمەن جۇمىس جاساۋدى ۇيرەنەدى. كەيىن مايدان دالاسىنا جىبەرىلەدى. لەنينگراد، ستالينگراد قالالارىن ازات ەتۋگە قاتىسادى.

اسكەردىڭ جولىن جارىلعىش زاتتان تازالاپ بەرلينگە دەيىن بارعان. ونداعى پوتسدام قالاسىن مينادان تازارتۋعا قاتىستى. سوعىس اياقتالعان سوڭ زۇلقارناي سەيىتوۆ مەكتەپ پارتاسىنا قايتا وتىرىپ، وقۋىن ءتامامدايدى. ومبىداعى اۋىل شارۋاشىلىعى ينستيتۋتىنا تۇسەدى. ونى بىتىرگەن سوڭ عىلىممەن اينالىسادى. الماتىداعى قازىرگى اگرارلىق جانە مەديتسينا ۋنيۆەرسيتەتتەرىندە بيوحيميادان ساباق بەرەدى. بيولوگيا عىلىمدارىنىڭ دوكتورى 96 جاسقا كەلگەنشە ءدارىس وقۋىن توقتاتپاعان.

ول 150-دەن استام عىلىمي جۇمىس پەن مونوگرافيانىڭ، 10 وقۋ قۇرالىنىڭ اۆتورى. ەڭبەگى ەلەنىپ، تالاي ماراپاتقا يە بولدى. ۇلى تالعاتتىڭ ايتۋىنشا، اكەسىنىڭ ۇزاق جاساۋىنىڭ سىرى دا وسى تىنىمسىز ەڭبەكتىڭ ناتيجەسى.

تالعات سەيىتوۆ، زۇلقارناي سەيىتوۆتىڭ ۇلى:

- بىلتىر 27-جەلتوقساندا اكەم 102-گە تولدى. بيىل 103-كە اياق باستى. مەن ەس بىلگەلى اكەمنىڭ دەمالعانىن كورگەن جوقپىن. ۇيگە كەلگەن سوڭ دا جۇمىس ىستەپ وتىراتىن. وقۋدان شارشامايتىن. 100-گە كەلگەنشە ءوزى ءجۇرىپ-تۇرىپ ەشكىمگە سالماعىن سالعان جوق. اياعى اۋىرىپ، ءجۇرۋى قيىنداعان كەزدە عانا ءدارىس وقۋىن توقتاتتى. سۇيەگى اسىل دەپ وسىنداي كىسىلەردى ايتاتىن شىعار. قازىر قۇلاعى اۋىر ەستيدى. ءبىراق نە سۇراعانىڭىزدى تۇسىنسە جاقسىلاپ تۇرىپ ايتىپ بەرەدى. ونى ءوزىڭىز دە كوردىڭىز.

ارداگەر عىلىممەن اينالىسقاندا العان ماراپاتتارىم ءبىر بولەك، ال سوعىس جىلدارى تاققان وردەن- مەدالدارىمنىڭ ورنى تىپتەن وزگەشە، - دەيدى. قارت مايدانگەردىڭ «قىزىل جۇلدىز»، II دارەجەلى «وتان سوعىسى» وردەندەرى جانە «ستالينگرادتى قورعاعانى ءۇشىن»، «ەرلىگى ءۇشىن» مەدالدارى تاعىلعان كوستيۋمى ۇنەمى قاسىندا ءىلۋلى تۇرادى. سوعان قاراپ سول ءبىر زۇلمات جىلداردى، تۋعان جەرگە ورالماعان قارۋلاس دوستارىن مۇڭايا ەسكە الادى.

اۆتورلارى: قارلىعاش قايىپبەكوۆا، مۇحيت قۇدىقبايەۆ

24.kz