سوعىس ارداگەرلەرى مەن تىل ەڭبەككەرلەرى قانشا زەينەتاقى الادى

استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى ولجاس انافين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ەكىنشى دۇنيەجۇزىلىك سوعىس ارداگەرلەرى مەن تىل ەڭبەككەرلەرى قانشا زەينەتاقى الاتىنىن ايتتى.

- 2025 -جىلعى 1 -مامىرعا ەكىنشى دۇنيەجۇزىلىك سوعىستىڭ ارداگەرلەرى الاتىن الەۋمەتتىك تولەمدەردىڭ جيىنتىق مولشەرى 271 مىڭ تەڭگە، وسى سوعىس كەزىندە تىل ەڭبەگىنە ارالاسقاندار الاتىن تولەمنىڭ جيىنتىق مولشەرى 179 مىڭ تەڭگە بولدى، - دەدى ۆيتسە- مينيستر.

سونداي-اق، ول بيىل جەرگىلىكتى اكىمدىكتەر ەكىنشى دۇنيەجۇزىلىك سوعىس ارداگەرلەرىنە 5 ميلليون تەڭگە كومەك بەرگەنىن ەسكە سالدى.

ولجاس انافيننىڭ سوزىنشە، جەڭىسكە ۇلەس قوسقان باسقا ساناتتاعى ازاماتتارعا دا قولداۋ كورسەتىلىپ جاتىر. اتاپ ايتقاندا:

- قورشاۋداعى لەنينگراد تۇرعىندارىنا - 60 مىڭنان 200 مىڭ تەڭگەگە دەيىن (64 ادام):

- بۇرىنعى كامەلەتكە تولماعان كونسلاگەر تۇتقىندارىنا - 98 مىڭنان 200 مىڭ تەڭگەگە دەيىن؛

- سوعىستا قايتىس بولعان مۇگەدەكتەردىڭ جۇبايلارىنا - 50 مىڭنان 150 مىڭ تەڭگەگە دەيىن؛

- سوعىستا قازا تاپقان جاۋىنگەرلەردىڭ جەسىرلەرىنە - 50 مىڭ تەڭگە؛

- تىل ەڭبەككەرلەرىنە - 50 مىڭنان 200 مىڭ تەڭگەگە دەيىن كومەك كورسەتىلىپ جاتىر.

رەسمي دەرەك بويىنشا، ەلىمىزدە ەكىنشى دۇنيەجۇزىلىك سوعىستىڭ 105 ارداگەرى قالعان.

اۆتور

ەسىمجان ناقتىباي