سوعىم باعاسى قانشا بولىپ جاتىر؟

استانا. قازاقپارات - قىلىشىن سۇيرەتىپ قىس جەتتى. قازاق ءدال وسى ۋاقىتتا سوعىم سويادى. قىستىق ازىعىن قامدايدى. كەيىنگى بىرەر كۇندە شىم-شىمداپ اياز كوتەرىلىپ، سوعىم سوياتىن جۇرتتىڭ قۇدايى بەرىپ قالدى.

دەمالىس كۇندەرى استانا جارمەڭكەسىندە سيىردىڭ ەتى كەلىسى 2300، قوي مەن جىلقى ەتى 2300 - 2 جارىم مىڭنان ساتىلعان. قالا جۇرتىنىڭ ءبىرازى ەتتى وسىلاي كەلىلەپ العانمەن، سوعىم سوياتىندار از ەمەس ارينە.

ءسويتىپ، سوعىمنىڭ باعاسى قانشا؟ بازار نارقى نە دەيدى؟

قاراشا، جەلتوقسان مەن سول ءبىر- ەكى اي... كورپەسىنە قاراي كوسىلەتىن، مۇرتىن مايلاماسا دا، ۇرتىن تولتىرىپ جەيتىن قازاق ءدال وسى ۋاقتا سوعىم ىزدەيدى. كوبى قازىسى ەكى ەلىدەن كەم شىقپايتىن جىلقى مالىنا كوز سالادى.

مارات قازاقستان ۇلى، قالا تۇرعىنى:

- سوعىم باستالعان ۋاقىتى عوي. قار ءتۇستى جەرگە. قازىر جىلىك مايى تولدى. دالادان سويعان مال دۇرىس بولادى. جايىلىمنان كەلگەن. كوبى جاڭاعى كارى دەپ الماي جاتادى. نەگىزى ناعىز ۆيتامينى جاسى تولعان 7 جاستان جوعارى سويعان مالدا دۇرىس بولادى. ءدال وسى مەزگىلدە جىلقى جارىقتىق قازىسىن قابىرعاسىنا جينايدى. قازاقتا دالاداعى جىلقىسىن ءيىرىپ، ىشىنەن سويىس مالىن ۇستايدى. قازىسى كەلىسپەسە بازارعا جۇگىرەدى.

ەلوردانىڭ مال بازارىن ءبىز دە شولىپ قايتتىق. بۇل جەردە جاباعىدان باستاپ تاي، قۇنان، دونەن، بايتال ءتىپتى تۋ بيەگە دەيىن بار.

ەلۋباي نۇرجانوۆ، مال ساتۋشى:

- جىلقىعا كەلەتىن بولساق مىنانداي 1,5 جاسارلاردى الۋعا بولادى، 1 سەمياعا. 170-18 ك گ دەيىن بەرەدى. ۇلكەندەرى 230-250 ك گ دەيىن بەرەدى. باعالارى شامامەن 380-400 مىڭ شاماسى. ۇلكەندەرى 600-650 مىڭعا دەيىن بارادى. وزگەرىس جوق. بىلتىرعىمەن بىردەي. بىلتىردا 2600 بولعان. بيىل دا 2600 بولىپ تۇر. ءجون بىلەتىن جۇرت قولعا بايلاعان مالدى ەمەس، تەبىندە جۇرگەنىن سويادى. ياعني قازاق جىلقىنى قار باستىرىپ، ءبىر اياز كورسەتىپ بارىپ پىشاققا جىعادى.

ەرجان جاۋباي، جۋرناليست:

- ارقادا ايازعا سوقتىرىپ العان جاقسى ەتتى. ويتكەنى ونىڭ سۇرلەنگەنىنە دە جاقسى بولادى. ال موڭعوليا قازاقتارىنىڭ قاراشا باسىندا سوياتىن سەبەبى سالقىن سول كەزدە ءتۇسىپ كەتەدى، ەكىنشىدەن جەل بار. جەلگە قاقتىرىپ الادى. ەتتى قانشا سۇرلەسە سونشا ۇزاق ساقتايدى عوي. سوعىمعا سوياتىن جىلقى كۇزگى سارى بۋىن ءشوپ دەيدى، سوعان ءبىر تويعان كەزدە ونىڭ ەتى نىعىزدالىپ، مايى تولىسادى، تاعامدىق قۇندىلىعى ارتادى.

سوعىم سويۋ قازاققا عانا ءتان. جەر بەتىندە قازاقتان وزگە حالىقتا مۇنداي ءداستۇر جوق. مال سويعان ەل ەتتى جازدى ىستايدى، تۇزدايدى. ال قىستان جازعا قالاتىن جىلقى ەتى سۇرلەنەدى. وعان مۇزداتقىشتىڭ دا قاجەتى جوق. 

24.kz