سوڭعى ساتتەگى داعدارىس: يزرايل حاماس- پەن جاسالعان كەلىسىم بويىنشا داۋىس بەرۋدى كەيىنگە قالدىردى

استانا. KAZINFORM - بەيسەنبى كۇنى يزرايل پرەمەر-ءمينيسترىنىڭ كەڭسەسى حاماس-تى بىرنەشە ماسەلە بويىنشا ءوز ۇستانىمدارىنان باس تارتتى دەپ ايىپتاپ، «سوڭعى ساتتە داعدارىس» تۋدىردى دەپ مالىمدەدى.

Кризис в последнюю минуту: Израиль откладывает голосование по сделке с ХАМАС
Фото: @IsraeliPM

حاماس بۇل ايىپتاۋلاردى جوققا شىعاردى، دەپ حابارلايدى Kazinform اگەنتتىگىنىڭ ارنايى ءتىلشىسى.

يزرايل پرەمەر- ءمينيسترى بينيامين نەتانياحۋ كەڭسەسى ۇكىمەتتىڭ اتىستى توقتاتۋ تۋرالى كەلىسىم بويىنشا داۋىس بەرۋىن كەيىنگە قالدىرعانىن مالىمدەدى. حابارلامادا حاماس كەيبىر كەلىسىمدەردەن باس تارتقانى جانە كەپىلگە الىنعانداردى بوساتۋ تۋرالى مامىلەنى اياقتاۋدا «سوڭعى ساتتە داعدارىس» تۋدىرعانى ايتىلعان.

- حاماس ۋاعدالاستىقتى بۇزىپ، سوڭعى ساتتە داعدارىس تۋدىرىپ، كەلىسىمگە قول جەتكىزۋگە كەدەرگى كەلتىرىپ وتىر. يزرايل ۇكىمەتى حاماس كەلىسىمنىڭ بارلىق ەلەمەنتتەرىن قابىلداعانى تۋرالى دەلدالداردان حابار المايىنش جينالىس وتكىزبەيدى، - دەلىنگەن اعىلشىن جانە يۆريت تىلدەرىندە جاريالانعان پرەمەر- مينيستر مالىمدەمەسىندە.

حاماس جوققا شىعاردى

حاماس قوزعالىسىنىڭ جوعارى لاۋازىمدى وكىلى يززات ءال- ريشەك پالەستينالىق توپتىڭ اتىستى توقتاتۋ جانە كەپىلگە الىنعانداردى بوساتۋ تۋرالى كەلىسىمنىڭ كەيبىر بولىكتەرىنەن باس تارتتى دەگەن ايىپتاۋلاردى جوققا شىعارىپ، ونىڭ دەلدالدار كەشە جاريالاعان كەلىسىمگە ادال ەكەنىن مالىمدەدى.

- نەتانياحۋ قوزعالىستىڭ اتىستى توقتاتۋ كەلىسىمىنىڭ شارتتارىنان باس تارتىپ جاتقانى تۋرالى مالىمدەمەلەرى ەش نەگىزسىز، - دەدى حاماس- تىڭ رەسمي وكىلى سامي ابۋ زۋحري.

گازا سەكتورى ءالى دە وق استىندا

نەتانياحۋ كەڭسەسىنىڭ مالىمدەمەسىنەن كەيىن يزرايل اسكەرى گازا سەكتورىنا شابۋىلدارىن كۇشەيتتى. سونىڭ سالدارىنان سوڭعى 24 ساعاتتا كەمىندە 81 پالەستينالىق قازا تاپتى، دەپ حابارلايدى انكلاۆتىڭ دەنساۋلىق ساقتاۋ مينيسترلىگى.

Al Jazeera اگەنتتىگىنىڭ حابارلاۋىنشا، گازا سەكتورىنىڭ سولتۇستىگىندەگى دجاباليا قالاسىنا يزرايلدىڭ شابۋىلىنان كەمىندە 20 ادام قازا تاپقان. گازا سەكتورىنىڭ دەنساۋلىق ساقتاۋ مينيسترلىگىنىڭ مالىمەتىنشە، اتىستى توقتاتۋ تۋرالى كەلىسىم جاريالانعاننان بەرى يزرايل شابۋىلدارى سالدارىنان كەمىندە 72 ادام قازا تاپقان.

ەسكە سالا كەتەيىك، كەشە اتىستى توقتاتۋ رەجيمى 19- قاڭتار، جەكسەنبى كۇنى كۇشىنە ەنەدى دەپ جاريالانعان بولاتىن.

اتىستى توقتاتۋ رەجيمىنىڭ كۇشىنە ەنۋىنە ءالى 72 ساعات قالعاندا، تۇرعىندار الداعى ساعاتتاردا قيراۋ مەن شىعىن كولەمىنىڭ ارتۋىنان قاۋىپتەنۋدە.

ماسەلە نەدە؟

قاتار مەن ا ق ش بۇل كەلىسىمگە كەلۋ پروتسەسىندە دەلدال رەتىندە قاتىسىپ، كەشە كەشكە ۋاعدالاستىققا قول جەتكىزىلگەنىن حابارلاعان بولاتىن. الايدا يزرايل كەلىسىمنىڭ ءالى دە شەشىلمەگەن تۇستارى بار ەكەنىن اتاپ وتۋدە. نەگىزگى كەلىسپەۋشىلىكتەر پالەستينالىق تۇتقىنداردى بوساتۋ ماسەلەسىنە قاتىستى تۋىنداعان.

يزرايل پرەمەر-ءمينيسترى حاماس- تى «بۇل قىلمىسكەرلەردىڭ اراسىنان كىم بوساتىلاتىنىن ديكتاتۋرامەن انىقتاۋعا تىرىسۋدا» دەپ ايىپتاپ، بۇل الدىن الا كەلىسىلگەن شارتتارعا قايشى كەلەتىنىن ايتۋدا. كەلىسىم ماتىنىندە تۇتقىنداردى بوساتۋ «ەكى تاراپتىڭ ماقۇلداعان تىزىمدەرى نەگىزىندە» جۇرگىزىلۋى ءتيىس دەپ كورسەتىلگەن.

The Times of Israel باسىلىمىنىڭ حابارلاۋىنشا، يزرايلدىڭ كەلىسسوزدەر توبى ءالى دە دوحا قالاسىندا، اتىستى توقتاتۋ جانە كەپىلگە الىنعانداردى بوساتۋ تۋرالى كەلىسىمنىڭ ەگجەي-تەگجەيلەرىن اياقتاپ جاتىر.

بينيامين نەتانياحۋ تۇپكىلىكتى كەلىسىمگە قول قويىلماعانىن جانە كەيبىر مالىمەتتەردىڭ ءالى ناقتىلانباعانىن ايتىپ، بۇل كەلىسىم تۋرالى ءالى رەسمي تۇردە جاريالامادى. پرەمەر- مينيستر كەلىسىم تولىق اياقتالعاننان كەيىن عانا حالىققا ۇندەۋ جاسايتىنىن مالىمدەدى.

كواليتسياعا جىك ءتۇستى مە؟

حاماس- قا تاعىلعان ايىپتارعا قاراماستان، كەيبىر يزرايلدىك ب ا ق داۋىس بەرۋدىڭ كەيىنگە قالدىرىلۋىن قارجى ءمينيسترى، ۋلترا وڭشىل «ءدىني سيونيزم» پارتياسىنىڭ جەتەكشىسى بەتسالەل سموتريچتى ۇكىمەتتەن شىقپاۋعا كوندىرۋگە باعىتتالعان سوڭعى ارەكەتتەرمەن بايلانىستىرادى.

يزرايلدىڭ Kan قوعامدىق حابار تاراتۋ قىزمەتى حابارلاعانداي، بەيسەنبى كۇنى ساعات 11:00-دە وتەدى دەپ جوسپارلانعان ۇكىمەت وتىرىسى بەيسەنبى تاڭىندا «ءدىني سيونيزم» پارتياسى ىشىندەگى تالقىلاۋلارعا بايلانىستى كەيىنگە قالدىرىلعان. پارتيا مۇشەلەرىنىڭ ۇكىمەت كواليتسياسىنداعى بولاشاعى تۋرالى شەشىم قابىلداۋ ءۇشىن جينالاتىنى تۋرالى حابارلاندى.

سونداي-اق، پرەمەر-مينيستر بينيامين نەتانياحۋ سموتريچ ءوز پارتياسىنىڭ بۇل كەلىسىمگە قارسى نارازىلىق بەلگىسى رەتىندە وتستاۆكاعا كەتەتىنى نەمەسە كەتپەيتىنى تۋرالى ناقتى جاۋاپ بەرمەيىنشە، ۇكىمەت وتىرىسىن شاقىرمايتىنى ايتىلدى.

وڭشىل پارتيانىڭ جەتەكشىسى بەتسالەل سموتريچ سارسەنبى كۇنى كەشكە بۇل كەلىسىمدى «جامان ءارى قاۋىپتى» دەپ ايىپتاپ، نارازىلىق رەتىندە پارتيانىڭ ۇكىمەتتەن شىعۋى مۇمكىن ەكەنىن مالىمدەگەن.

وسىعان دەيىن يزرايل مەن حاماس اراسىنداعى كەلىسىمگە نە كەدەرگى بولىپ وتىرعانى تۋرالى جازعان ەدىك.

اۆتور

ايجان سەرىكجان قىزى

سوڭعى جاڭالىقتار