سوڭعى قوڭىراۋ: وقۋ-اعارتۋ ءمينيسترى اتا-انالارعا ۇندەۋ جاسادى
استانا. KAZINFORM - سوڭعى قوڭىراۋ كەزىندە اتا-انالار مەكتەپتەگى مەرەكەلىك ءىس-شارالارعا شىعىندالىپ، بالالاردى ىسىراپقا ۇيرەتپەۋى كەرەك. بۇل تۋرالى وقۋ-اعارتۋ ءمينيسترى عاني بەيسەمبايەۆ ءمالىم ەتتى.
- سوڭعى قوڭىراۋ 25-مامىر بولىپ قالادى، ول ءتيىستى بۇيرىقتا تۇر. ءبىز بالالارىمىزعا اقشانى ورىنسىز جۇمساۋعا ۇيرەتپەۋىمىز كەرەك. ويتكەنى مەكتەپ -تاربيە ورتاسى، وسكەلەڭ ۇرپاققا ۇلگى. قازىر اتا-انالار مەيرامحانا مەن ءدامحانا ىزدەپ اۋرە بولىپ جۇرسە، وندا ءبىز قانداي ۇرپاق وسىرەمىز؟ سوندىقتان قاراپايىم جانە ۇنەمدى بولعان ءجون. بارلىق قاراجاتتى مەيرامحانالارعا ەمەس، بالالاردىڭ ءال-اۋقاتىنا جۇمساعان دۇرىس. ال جيناعان اقشانى مەيرامحانالارعا شاشۋ - بالالاردىڭ بولاشاعى مەن ءال-اۋقاتىنا تەرىس اسەر ەتەدى، - دەدى ع. بەيسەمبايەۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ەسكە سالساق، بىلتىر ەل مەكتەپتەرىندە سوڭعى قوڭىراۋ 25 -مامىردا سوعىلدى.
ونىڭ الدىنداعى جىلى وقۋشىلاردىڭ سوڭعى قوڭىراۋ مەرەكەسى 1- ماۋسىمدا وتەتىنى ايتىلعان ەدى.
