سوڭعى جىلدا شەتەلدەن 23 ميلليارد دوللار ينۆەستيتسيا تارتىلدى - پرەزيدەنت

استانا. KAZINFORM - پرەزيدەنت قاسىم-جومارت توقايەۆ الماتىدا ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەيا كەڭەسىنىڭ وتىرىسىنا قاتىسۋشىلارمەن كەزدەسۋ بارىسىندا قازاقستان ۇ ق ش ۇ- عا ءتوراعالىعى اياسىندا قاۋىپسىزدىكتى قامتاماسىز ەتۋدى كوزدەيتىن حالىقارالىق ۇيىمدارمەن جانە قۇرىلىمدارمەن ىقپالداستىقتى نىعايتۋعا نيەتتى ەكەنىن ايتتى. بۇل تۋرالى اقوردانىڭ باسپا ءسوز قىزمەتى ءمالىم ەتتى.

- ب ۇ ۇ، ت م د جانە ش ى ۇ- نىڭ سالالىق قۇرىلىمدارىمەن ىنتىماقتاستىقتى كەڭەيتۋ اسا ماڭىزدى دەپ سانايمىز. بيىل قاڭتار ايىندا ۇ ق ش ۇ حاتشىلىعى مەن ت م د تەرروريزمگە قارسى كۇرەس ورتالىعى اراسىنداعى ىنتىماقتاستىق تۋرالى مەموراندۋمعا قول قويىلدى. ءبىز مۇنى قۇپتايمىز، - دەدى پرەزيدەنت.

مەملەكەت باسشىسى سپيكەرلەرگە قازاقستاندا جۇرگىزىلىپ جاتقان رەفورمالار قوعامنىڭ بارلىق سالاسىن، سونىڭ ىشىندە ساياسات، ەكونوميكا جانە يدەولوگيا باعىتتارىن جۇيەلى تۇردە جاڭعىرتۋدى كوزدەيتىنىن ايتتى.

قاسىم-جومارت توقايەۆ ەكونوميكا سالاسىنا توقتالا كەلىپ، ەلىمىزدىڭ ج ءى ءو كولەمى 265 ميلليارد دوللارعا جەتكەنىن مالىمدەدى.

- 2023 -جىلى شەتەلدەن 23 ميلليارد دوللاردان استام تىكەلەي ينۆەستيتسيا تارتىلدى. ەلىمىزدىڭ حالىقارالىق رەزەرۆتەرى 100 ميلليارد دوللارعا جۋىقتادى. حالىقارالىق ۆاليۋتا قورىنىڭ بولجامى بويىنشا بيىل قازاقستاننىڭ جان باسىنا شاققانداعى جالپى ىشكى ءونىمى 13 پايىزعا ءوسىپ، شامامەن 15 ميلليارد دوللاردى قۇراۋعا ءتيىس. جاقىندا مەن كاسىپكەرلىك ەركىندىك پەن باسەكەلەستىكتىڭ دامۋىن قامتاماسىز ەتۋ، مەملەكەتتىڭ ەكونوميكاداعى ۇلەسىن قىسقارتۋ جانە بيزنەس شىعىندارىن ازايتۋ ارقىلى ەكونوميكانى ىرىقتاندىرۋعا نەگىز قالايتىن جارلىققا قول قويدىم. ەكونوميكالىق قىزمەت سالاسىنداعى قىلمىستىق قۇقىقبۇزۋشىلىقتاردى دەكريميناليزاتسيالاۋ ارقاسىندا بيزنەستىڭ قۇقىقتارى مەن زاڭدى مۇددەلەرىن قورعاۋ ءىسى ايتارلىقتاي كۇشەيدى، - دەدى پرەزيدەنت.

سونداي-اق مەملەكەت باسشىسى قاسىم-جومارت توقايەۆ ۇ ق ش ۇ ەلدەرىمەن اراداعى ساۋدا-ساتتىقتىڭ قارقىندى ءوسىپ كەلە جاتقانىنا كوڭىلى تولاتىنىن جەتكىزدى.

- بىلتىر قازاقستان مەن رەسەيدىڭ ساۋدا كولەمى 26 ميلليارد دوللارعا جەتتى. ال قىرعىزستانمەن اراداعى ساۋدا اينالىمى 1 ميلليارد 571 ميلليون دوللاردى، تاجىكستانمەن 1 ميلليارد 130 ميلليون دوللاردى، بەلارۋسپەن 912 ميلليون دوللاردى قۇرادى، - دەدى پرەزيدەنت.

جيىن سوڭىندا قاسىم-جومارت توقايەۆ ۇ ق ش ۇ پارلامەنتتىك اسسامبلەيا كەڭەسىنىڭ وتىرىسى ۇيىمعا مۇشە ءار ەلدىڭ مۇددەسىن ەسكەرە وتىرىپ، مەملەكەتتەردىڭ ۇلتتىق زاڭنامالارىن ىلگەرىلەتۋگە جانە ءوزارا ۇيلەستىرۋگە ەلەۋلى ۇلەس قوساتىنىن اتاپ ءوتتى. سونداي-اق كەڭەس قابىلدايتىن قۇجاتتار ۇ ق ش ۇ- نى ودان ءارى دامىتۋعا سەپتىگىن تيگىزەتىنىنە سەنىم ءبىلدىردى.

كەزدەسۋ بارىسىندا ۇ ق ش ۇ پارلامەنتتىك اسسامبلەياسىنىڭ ءتوراعاسى - رەسەي مەملەكەتتىك دۋماسىنىڭ ءتوراعاسى ۆياچەسلاۆ ۆولودين، بەلارۋس رەسپۋبليكاسى ۇلتتىق جينالىسى وكىلدەرى پالاتاسىنىڭ ءتوراعاسى يگور سەرگەەنكو، تاجىكستان رەسپۋبليكاسىنىڭ مادجليسي ولي مادجليسي ميللي ءتوراعاسى رۋستامي ەمومالي ءسوز سويلەدى.

اۆتور

باقىتگۇل اباي قىزى