سوڭعى ايلاردا وزبەكستانعا 260 مىڭنان استام قازاقستاندىق تۋريست بارعان

تاشكەنت. KAZINFORM - قاڭتار- ناۋرىز ايلارىندا وزبەكستانعا 1 ميلليون 519,3 مىڭ تۋريست بارعان، بۇل وتكەن جىلدىڭ سايكەس كەزەڭىمەن سالىستىرعاندا 31,7 مىڭ ادامعا نەمەسە 2,1 پايىزعا جوعارى.

ولاردىڭ باسىم كوپشىلىگى تاجىكستان، قىرعىزستان جانە قازاقستان ازاماتتارى. بۇل تۋرالى مەملەكەتتەگى ستاتيستيكا اگەنتتىگىنىڭ اقپارات قىزمەتى حابارلادى.

جىلدىڭ العاشقى 3 ايىندا ەڭ كوپ تۋريستەر تاجىكستاننان (536,5 مىڭ)، قىرعىزستاننان (442 مىڭ) جانە قازاقستاننان (262,6 مىڭ) بارعان.

سونداي-اق، ەلگە رەسەيدەن 134200، تۇركىمەنستاننان 31000، تۇركيادان 21500، ءۇندىستاننان 11600، قىتايدان 10000، وڭتۇستىك كورەيادان 7600 جانە گەرمانيادان 3800 تۋريست كەلگەن.

باسقا ەلدەردىڭ ۇلەسىنە 58500 تۋريست تۋرا كەلدى.

ەستەرىڭىزگە سالا كەتەيىك، بيىل وزبەكستان 2,2 ميلليون قازاقستاندىق تۋريستى قابىلداۋعا نيەتتى.

اۆتور

جاراسقان نۇرىبايەۆ