سوڭعى 22 جىلدا اۋىل شارۋاشىلىعىنا بولىنەتىن سۋبسيديا 150 ەسە ارتقان

استانا. KAZINFORM - بەلگىلى اگرارلىق ساراپشى، «اۋىل» پارتياسى ءتوراعاسىنىڭ ءبىرىنشى ورىنباسارى تولەۋتاي راحىمبەكوۆ كەيىنگى 22 جىلدا اۋىل شارۋاشىلىعىنا بيۋدجەتتەن بولىنەتىن سۋبسيديا كولەمى 150 ەسە وسكەنىن ايتادى.

«جالپى اۋىل شارۋاشىلىعىنا مەملەكەت تاراپىنان قوماقتى قارجى ءبولىنىپ وتىر. سۋبسيديانىڭ ءوزى 500 ميلليارد تەڭگەگە جەتتى. مىسالى، 2002 -جىلى سالاعا بولىنەتىن سۋبسيديانىڭ كولەمى 3,5 ميلليارد تەڭگە بولاتىن. سودان بەرگى 22 جىلدىڭ ىشىندە 150 ەسە ءوستى. ول كەزدە 1 دوللار 150 تەڭگە بولسا، قازىر 450-دەن جوعارى دەگەننىڭ وزىندە ينۆەستيتسيا ءۇش ەسە ارتقان. ياعني، سۋبسيديانىڭ ارتۋى ينۆەستيتسيادان مۇلدە الدا. ءبىراق وسى سۋبسيديا ۇلەستىرۋ ەرەجەسىن كۇردەلى تۇردە وزگەرتۋ كەرەك. قازىر ارزانداتىلعان نەسيە مەن سۋبسيدياعا فەرمەرلەردىڭ 5 پايىزى عانا قول جەتكىزىپ وتىر. ولار - بيلىككە جاقىن، اكىمگە جاقىن ءىرى فەرمەرلەر. ال 95 پايىز ۇساق شارۋاشىلىقتاردىڭ مۇرنىنا ول قاراجاتتىڭ ءيىسى دە بارىپ جاتقان جوق»، - دەيدى ساراپشى.

ونىڭ پايىمداۋىنشا، سۋبسيديا ۇلەستىرۋدەگى ادىلەتسىزدىكتى جويۋ ءۇشىن ەرەجەنى وزگەرتۋ كەرەك.

«اۋىل» پارتياسى «ازىق-تۇلىك قاۋىپسىزدىگى تۋرالى» زاڭ جوباسىنا دا، اگروبانك قۇرۋ تۋرالى ۇسىنىستارىندا دا وسى ماسەلەنى كوتەرىپ ءجۇر. بەس جىلدان بەرى ول ۇسىنىستارىمىز قولداۋ تاپپاي كەلەدى. ءبىزدىڭ پارتيانىڭ ماجىلىستەگى 8 دەپۋتات باسىم داۋىسقا يە بولا الماعاندىقتان ايتقانىمىز ورىندالماي جاتىر. پارلامەنتتەگى وكىلىمىز كوپ بولعاندا وسى ۇسىنىستار ىسكە اسار ما ەدى»، - دەيدى تولەۋتاي راحىمبەكوۆ.

اۆتور

ەسىمجان ناقتىباي