ستۋدەنت ولىمىنە بايلانىستى قازۇۋ-دا پرورەكتور مەن دەكان جۇمىسىنان كەتتى
الماتى. KAZINFORM - ءال-فارابي اتىنداعى قازۇۋ ستۋدەنت ولىمىنە بايلانىستى مالىمدەمە جاسادى.
ۋنيۆەرسيتەت باسپا ءسوز قىزمەتىنىڭ مالىمەتىنشە، قايعىلى جاعدايعا بايلانىستى ج و و باسشىلىعى تاراپىنان شۇعىل شارالار قابىلدانعان. اتاپ ايتقاندا، جاتاقحاناداعى قاۋىپسىزدىك پەن ءتارتىپتى ءتيىستى دەڭگەيدە قامتاماسىز ەتە الماعانى ءۇشىن باسقارما مۇشەسى - الەۋمەتتىك تۇراقتى دامۋ جونىندەگى پرورەكتور، سونداي-اق گەوگرافيا جانە تابيعاتتى پايدالانۋ فاكۋلتەتىنىڭ دەكانى لاۋازىمدارىنان بوساتىلعان.
ودان بولەك جاتاقحانادا سول كۇنى كەزەكشىلىكتە بولعان جاۋاپتى قىزمەتكەرلەر جۇمىستان شەتتەتىلگەن. قازىر ولاردىڭ ارەكەتتەرىنە قۇقىقتىق باعا بەرىلىپ جاتىر.
- بولعان وقيعا - ۋنيۆەرسيتەت قاۋىمى ءۇشىن ورنى تولماس اۋىر قايعى. ستۋدەنتىمىزدىڭ قازاسى قابىرعامىزدى قايىستىردى. ۋنيۆەرسيتەت وتباسىمەن بايلانىستا جانە قاجەتتى قولداۋ كورسەتۋگە ءاردايىم دايىن، - دەپ حابارلادى ۋنيۆەرسيتەتتەن.
سونداي-اق قازىر بارلىق جاتاقحانالاردا كەشكى باقىلاۋ كۇشەيتىلىپ، ستۋدەنتتەردىڭ قاۋىپسىزدىگىن قامتاماسىز ەتۋ جانە كاسىبي پسيحولوگيالىق كومەك كورسەتۋ بويىنشا قوسىمشا شارالار ەنگىزىلگەنى اتاپ ءوتىلدى.
ءال-فارابي اتىنداعى قازۇۋ بۇل وقيعاعا قاتىستى ەشقانداي دەرەكتى جاسىرمايتىنىن، قۇقىق قورعاۋ ورگاندارى جۇرگىزىپ جاتقان تەرگەۋگە كومەك كورسەتىپ جاتقانىن جانە ءىستىڭ ءادىل، اشىق وتۋىنە تىكەلەي مۇددەلى ەكەنىن مالىمدەدى.
ەسكە سالايىق، كەشە ءال-فارابي اتىنداعى قازاق ۇلتتىق ۋنيۆەرسيتەتىنىڭ گەوگرافيا جانە تابيعاتتى پايدالانۋ فاكۋلتەتىندە وقىعان ءبىرىنشى كۋرس ستۋدەنتى مەرت بولعانى بەلگىلى بولدى.
اۆتورلار
دوسبول اتاجان