سپۋتنيكتەرى كاسپي تەڭىزىندەگى فانتوم- ارالىن اشتى
استانا. KAZINFORM - «ەلەس ارالى» ازەربايجاننىڭ شىعىس جاعالاۋىنان 25 شاقىرىم جەردە ورنالاسقان جانە چيگيل- دەنيز دەپ اتالادى، دەپ حابارلايدى امەريكالىق NASA عارىش اگەنتتىگىنىڭ جەر وبسەرۆاتورياسى.

وبسەرۆاتوريا مالىمەتىنشە، ونىڭ Landsat 8 جانە 9 قۇرىلعىلارى 2022 -جىلدىڭ قاراشاسىنان 2024 -جىلدىڭ جەلتوقسانىنا دەيىن كاسپي تەڭىزىنىڭ جاعالاۋ ايماعىن بىرنەشە سۋرەتكە ءتۇسىرىپ، ارالدى كەزدەيسوق تاۋىپ العان.
سپۋتنيكتىك باقىلاۋلار ونىڭ 2023 -جىلدىڭ باسىندا كۋماني- بەنك بالشىق جانارتاۋى اتقىلاۋىنان كەيىن كاسپي تەڭىزىنىڭ سۋىنان كوتەرىلگەنىن انىقتادى. 2024 -جىلدىڭ سوڭىنا قاراي سۋ ۇستىندە الدەقايدا از بولىگى كورىندى.
- ەڭ كەڭ نۇكتەسىندە ارال كولدەنەڭىنەن 400 مەتر (1300 فۋت) بولدى. بۇل ءتورت فۋتبول الاڭىنىڭ ۇزىندىعىنان ءسال اسادى، - دەدى وبسەرۆاتوريادان.

كۋماني- بەنكتىڭ بۇعان دەيىن تىركەلگەن سەگىز اتقىلاۋى تولقىندار تۇرىندە بولدى جانە ەكى كۇنگە عانا سوزىلدى. اتاپ ايتقاندا، 1861 -جىلى مامىردا اتقىلاۋ سۋدان ەنى 87 مەتر جانە بيىكتىگى 3,5 مەتر ارالدى قۇرادى. ول 1862 -جىلدىڭ باسىندا شايىلىپ كەتكەن. ەڭ كۇشتى اتقىلاۋ 1950 -جىلى بولدى. وندا ەنى 700 مەتر جانە بيىكتىگى 6 مەتر ارال پايدا بولدى.
ازەربايجان اۋماعى بالشىق جانارتاۋلارىنىڭ جوعارى شوعىرلانۋىمەن ەرەكشەلەنەدى. گەولوگتار ولاردىڭ 300-دەن استامىن شىعىس ازەربايجاندا جانە كاسپي تەڭىزىنىڭ قايراڭىندا ەسەپتەدى. ولاردىڭ كوپشىلىگى قۇرلىقتا ورنالاسقان. سەبەبى، بۇل ايماق اراب جانە ەۋرازيالىق تەكتونيكالىق پليتالار سوقتىعىساتىن كونۆەرگەنسيا ايماعىندا ورنالاسقان.
ازەربايجاننىڭ بالشىق جانارتاۋلارى وڭتۇستىك كاسپي ويپاتىنىڭ كەڭ كولەمدى كومىرسۋتەگى جۇيەسىمەن بايلانىستى جانە مەتان سياقتى جانعىش گازداردى شىعاراتىنى بەلگىلى. وبسەرۆاتوريا 2023 -جىلى كۋماني بەنك ارالىنىڭ اتقىلاۋىنىڭ وت تۇرىندە بولعانىنا سەنىمدى ەمەس. الايدا، باقىلاۋلار كورسەتكەندەي، جاقىن ماڭداعى باسقا دا بالشىق جانارتاۋلارىنىڭ اتقىلاۋى اۋاعا جۇزدەگەن مەتر جالىن باعاندارىن جىبەرگەن.
ەركەجان سماعۇلوۆا
اۆتور