ۇستازدار اراسىندا «وي ساندىق» رەسپۋبليكالىق ينتەللەكتۋالدى سايىس ءوتتى

استانا. KAZINFORM - ەلوردادا تۇڭعىش رەت «وقۋ جانە ماتەماتيكالىق ساۋاتتىلىق: تابىستى سينەرگيا» تاقىرىبىنداعى «وي ساندىق» رەسپۋبليكالىق ينتەللەكتۋالدى سايىسى ءوتىپ جاتىر.

ұстаздар
Фото: Ризабек Нүсіпбекұлы/Kazinform

بايقاۋدا رەسپۋبليكا بويىنشا جۇزدەن جۇيرىك شىققان 100 قازاق ءتىلى مەن ادەبيەتى جانە 100 ماتەماتيكا ءپانى مۇعالىمى باق سىنادى. سايىس ءتۇسىنىپ وقۋ، لوگيكالىق ويلاۋ، ءدال ەسەپتەۋ باعىتتارى بويىنشا ءوتتى. شارانى ق ر وقۋ-اعارتۋ مينيسترلىگى مەن Zerdeli اقىل-وي دامىتۋ مەكتەبى بىرلەسىپ ۇيىمداستىردى.

ұстаздар
Фото: Ризабек Нүсіпбекұлы/Kazinform

«قازاق ءتىلى مەن ادەبيەتى جانە ماتەماتيكا ءپانى مۇعالىمدەرى اراسىنداعى بۇل بايقاۋ رەسپۋبليكالىق دەڭگەيدە تۇڭعىش رەت ءوتىپ جاتىر. جالپى فۋنكسيونالدىق ساۋاتتىلىق ماسەلەسى ورتا ءبىلىم بەرۋ سالاسىنداعى ءبىلىم ساپاسىن كوتەرۋ ماقساتىندا 2016 جىلعى رەفورما نەگىزىندە ەنگىزىلگەن ۇلكەن باعىت. سونىڭ ناتيجەسىندە جاقسى ىلگەرلەۋشىلىك بار. مىسالى ماتەماتيكالىق ساۋاتتىلىقتان قازاقستان وقۋشىلارى 83 مەملەكەت قاتىسقان الەمدىك بايقاۋدا 50-ورىن، وقۋ ساۋاتتىلىعىنان 64-ورىن الدى. سوندىقتان بالالاردىڭ وقۋ ساۋاتتىلىعى تىكەلەي ءبىلىم ساپاسىنا اسەر ەتەتىن داعدى بولعاندىقتان وقۋ-اعارتۋ مينيسترلىگى ەرەكشە ءمان بەرىپ وتىر. وقۋشى تاپسىرمانى جاقسى ءتۇسىنۋ ءۇشىن الدىمەن ونىڭ ءماتىنىن انىق ءتۇسىنۋى كەرەك. بالالاردى سوعان داعدىلاندىرۋ ءۇشىن الدىمەن پەداگوگتاردى شىڭداپ شىعۋىمىز قاجەت. سول ماقساتپەن مينيسترلىك پەداگوگتاردىڭ بىلىكتىلىگىن ارتتىرۋ جۇمىسىندا دا وقۋ ساۋاتتىلىعىنا، ماتەماتيكالىق ساۋاتتىلىعىنا باسىمدىق بەرىپ ءجۇر. مىنە وسىدان كەيىن وقۋ جانە ماتەماتيكالىق ساۋاتتىلىق ەكەۋى قوسىلعاندا تابىستى سينەرگيا بەرۋ كەرەك دەگەن وي تۋدى. وسى ۇيىمداستىرىلىپ وتىرعان بايقاۋدا ادەبي ماتىندەر، ماتەماتيكالىق ۇسىنىمدار مەن ەسەپتەر، اۋىزشا تاپسىرمالار مەن پراكتيكالىق قولدانىستا كەزىگەتىن ماتەماتيكالىق ەسەپتەردى دايىنداپ ۇسىندىق. بايقاۋعا قاتىسقان مۇعالىمدەر بۇل تاپسىرمالاردى تىڭ جاڭالىق بولدى دەپ جوعارى باعالاپ جاتىر. بۇيىرسا، الداعى جىلداردا دا اتالعان بايقاۋ كەمەلدەنىپ، ءداستۇرلى تۇردە جالعاسىن تابادى دەگەن ۇمىتتەمىز»، - دەيدى ق ر وقۋ-اعارتۋ مينيسترلىگى ورتا ءبىلىم بەرۋ كوميتەتىنىڭ توراعاسى قانىبەك بەكبولات  ۇلى جۇماشيەۆ.

ينتەللەكتۋالدى جارىس ەكى جارىم مىڭ ادامعا ارنالعان Beeline Arena - دا ءوتىپ جاتىر. بۇل باستاما حالقىمىزدىڭ وسىنداي ۇلكەن ستاديونداردا بوكس، كۇرەس سەكىلدى سپورتتىق ويىنداردى عانا ەمەس ۇلكەن ءبىلىم دودالارىن، ءبىلىم سايىستارىن تاماشالايتىن ەلگە اينالساق دەگەن نيەتتەن تۋدى دەيدى Zerdeli اقىل-وي دامىتۋ مەكتەبىنىڭ ديرەكتورى رىسبەك ءماۋىت.
« بۇل جوبا - وقۋ جانە ماتەماتيكالىق ساۋاتتىلىق كىرىكتىرىلگەن، مەكتەپتىڭ نەگىزگى ەكى تىرەك ءپانى - قازاق ءتىلى مەن ماتەماتيكا بىرىكتىرىلگەن، مۇعالىمدەرگە ارنالعان، ەڭ وزەكتى ەكى ءپان مۇعالىمدەرىن دوستاسا جۇمىس جاساۋعا ۇندەيتىن العاشقى بىرەگەي جوبا دەپ ويلايمىن. ءبىلىم جارىسىن وسىنداي ۇلكەن زالدا، ۇلكەن ارەنادا كورسەتكىمىز كەلدى. ماقساتىمىز ءبىلىمدى ترەندكە اينالدىرۋ، ءبىلىمدى، بىلىكتى ادامداردى قوعامعا ناسيحاتتاۋ. ءبىلىمدى جاستاردى باتىر، تۇلعا رەتىندە كورسەتۋ. شىن مانىندە بۇگىنگى تاڭدا ءبىلمدى ۇرپاق العا شىعاتىن، بىلىممەن باسەكەگە تۇسەتىن زامان كەلدى. بۇل جوباعا ق ر وقۋ-اعارتۋ مينيسترلىگىنىڭ ورتا ءبىلىم كوميتەتى باستاماشى بولدى»، - دەيدى رىسبەك ءماۋىت.

سوڭعى جاڭالىقتار