سەرىك جۇمانعارين سالىق رەفورماسىن سىناپ جۇرگەندەردىڭ ارتىندا كىم تۇرعانىن ايتتى
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين ءماجىلىس وتىرىسىنان كەيىن وتكەن باسپا ءسوز ءماسليحاتىندا سالىق رەفورماسىن ءجيى سىناپ جۇرگەندەردىڭ ارتىندا كىم تۇرعانىن ايتتى.
- رەفورما ءالى باستالعان جوق. سالىق كودەكسىنىڭ جوباسى تولىق ماقۇلدانعاننان كەيىن 2026 -جىلدىڭ 1- قاڭتارىنان باستاپ كۇشىنە ەنەدى. ال ونىڭ بيزنەسكە اسەرىن 2026 -جىلدىڭ ناۋرىزىندا عانا كور باستايمىز. ال قازىر ايتىلىپ جۇرگەن ءتۇرلى سىني پايىمداردىڭ، بلوگەرلەردىڭ ارتىندا ەلدەگى احۋال، جۇيە وزگەرگەنىنە جان-تانىمەن قارسى ادامدار تۇر. ولارعا قازىرگىدەي جۇيەدە ءومىر ءسۇرۋ قولايلى - سالىق تولەمەيدى، شەكتەن تىس تابىس الادى، ول تابىسىن قازاقستان ەكونوميكاسىنا سالمايدى. تۇسىنەسىزدەر مە، - دەدى ول.
سەرىك جۇمانعاريننىڭ سوزىنشە، بۇل رەفورما حالىقتىڭ سالىق تۋرالى تۇسىنىگىن وزگەرتەدى.
- ءبىز بۇل احۋالدى وزگەرتەمىز. ماسەلە ءتىپتى سالىق رەفورماسىندا عانا ەمەس، مەنتاليتەت پەن سانان وزگەرتۋدە. شىنىن ايتساق، وسى تۇسىنىكتەردى وزگەرتۋگە بەل شەشىپ كىرىسۋگە دايىنبىز. سالىق تولەۋ كەرەك، - دەدى ۆيتسە-پرەمەر.
ەسكە سالساق، «اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى رايىمبەك باتالوۆ قوسىلعان قۇن سالىعىن كوتەرۋدەن تۇسەتىن كىرىستىڭ ۇكىمەت كۇتكەندەي كولەمدە بولماۋى مۇمكىن ەكەنىن ايتقان ەدى.
اۆتور
ەسىمجان ناقتىباي
