سەرىك جۇمانعارين Magnum-گە جاريالانعان قوعامدىق بويكوت تۋرالى: بۇل بىزگە ۇلكەن ساباق
استانا. KAZINFORM - پرەمەر-ءمينيستردىڭ ورىنباسارى -ۇلتتىق ەكونوميكا ءمينيسترى سەرىك جۇمانعارين ءماجىلىستىڭ جالپى وتىرىسىنان كەيىن وتكەن باسپا ءسوز ءماسليحاتىندا Magnum ساۋدا جەلىسىنە جاريالانعان قوعامدىق بويكوت تۋرالى پىكىر ءبىلدىردى.
- الەۋمەتتىك جەلىدە كليەنتتەن قازاقشا سويلەۋدى وتىنگەن تاپسىرىس جەتكىزۋشىنىڭ جۇمىستان قۋىلۋىنا بايلانىستى Magnum ساۋدا جەلىسىنە جاريالانعان بويكوت قاتتى تالقىلانىپ جاتىر. اتالعان جاعداي بويىنشا ءسىزدىڭ ۇستانىمىڭىز قانداي، - دەپ سۇرادى جۋرناليست.
ۆيتسە-پرەمەر بۇل قازاقستاندىقتارعا الەۋمەتتىك جەلىدە ءار سوزگە اباي بولۋ كەرەكتىگىن كورسەتتى دەپ ەسەپتەيدى.
- بۇل بار بولعانى جەكە ادامداردىڭ اراسىنداعى تۇرمىستىق داۋ. ءبىراق بىزگە ۇلكەن ساباق بولدى. ونداي ءتىل ماسەلەلەرىن، ۇلتتىق ماسەلەلەردى تالقىلاعاندا، الەۋمەتتىك جەلىدە جازعاندا ابايلاۋ كەرەك. قاراپايىم عانا 20 ميلليون حالقىمىز بار. تاتۋ بولۋىمىز كەرەك. قازاقتار ايتادى عوي «اۋىلى ارالاس، قويى قورالاس بولۋ» كەرەك. بىزگە نە كەرەك؟ قاراپايىم، قارادومالاق قازاقتاردىڭ باسى امان بولسىن، بولاشاقتا. ودان باسقا ەشتەڭە كەرەك ەمەس. مەنىڭ ويىمشا ول شەشىلەتىن ماسەلە، - دەگەن سەرىك جۇمانعارين كليەنتتەن قازاقشا سويلەۋدى تالاپ ەتكەنى ءۇشىن جۇمىستان قۋىلعان جىگىت قازىر باسقا جۇمىس تاپقانىن ءمالىم ەتتى.
ايتا كەتەيىك، بۇگىن ءماجىلىستىڭ جالپى وتىرىسىندا ق ق س سالىناتىن اينالىمنىڭ تومەنگى شەگى 40 ميلليون تەڭگە بولۋى مۇمكىن ەكەنى بەلگىلى بولدى.
اۆتور
ەسىمجان ناقتىباي
