سەنات ترانسشەكارالىق وزەندەردى حالىقارالىق نەگىزدە پايدالانۋ قۇجاتىن بەكىتتى

استانا. KAZINFORM - بۇگىن سەناتتىڭ جالپى وتىرىسىندا «حالىقارالىق سۋ اعىندارىن كەمە قاتىناسىنان باسقاشا پايدالانۋ تۇرلەرىنىڭ قۇقىعى تۋرالى كونۆەنتسيانى راتيفيكاتسيالاۋ تۋرالى» زاڭى ماقۇلداندى.

«بۇل كونۆەنسيانى بىرىككەن ۇلتتار ۇيىمىنىڭ باس اسسامبلەياسى 1997-جىلعى 21-مامىردا قابىلداپ، 2014 -جىلعى 17-تامىزدان باستاپ كۇشىنە ەندى. قازىرگى كەزدە 37 مەملەكەت كونۆەنسيانىڭ قاتىسۋشىسى. قازاقستانمەن كورشىلەس ەلدەردىڭ ىشىندە تەك وزبەكستان رەسپۋبليكاسى كونۆەنسيانىڭ مۇشەسى. قۇجات ترانسشەكارالىق وزەندەر مەن كولدەردى جانە ولارمەن بايلانىستى جەراستى سۋلارىن بۇكىل الەمدە تەڭ قۇقىقتى ءارى تۇراقتى باسقارۋعا ىقپال ەتەتىن جاھاندىق قۇقىقتىق مەحانيزم سانالادى. كونۆەنسياعا قوسىلۋ - قازاقستاننىڭ ترانسشەكارالىق وزەندەردى حالىقارالىق قۇقىق قاعيداتتارى نەگىزىندە پايدالانۋ جانە قورعاۋ ماسەلەسى بويىنشا كورشى ەلدەرمەن ءوزارا ءىس-قيمىلداعى ۇستانىمىن نىعايتادى»، - دەدى سەناتور جانبولات جورگەنبايەۆ.

ونىڭ ايتۋىنشا، بۇل كونۆەنسيادا حالىقارالىق سۋ اعىندارىن ءادىل ءارى اقىلعا قونىمدى پايدالانۋ قاعيداتتارى ايقىندالعان. سونىمەن قاتار، قۇجات ترانسشەكارالىق سۋدى پايدالانۋدىڭ نەعۇرلىم وتكىر مەملەكەتارالىق ماسەلەلەرىن شەشۋ ءۇشىن ورتاق قۇقىقتىق الاڭ قۇرۋعا مۇمكىندىك بەرەدى.

«كونۆەنسياعا قوسىلۋدىڭ نەگىزگى فاكتورلارىنىڭ ءبىرى - وزبەكستانمەن ترانسشەكارالىق وزەن باسسەيندەرىندە گيدروتەحنيكالىق قۇرىلىستار سالۋ جونىندە جوسپارلانعان ءىس-شارالاردى ۇيلەستىرۋ، ونىڭ ىشىندە قازاقستان رەسپۋبليكاسى مەن وزبەكستان رەسپۋبليكاسى اراسىنداعى ترانسشەكارالىق سۋ ايدىندارىن بىرلەسىپ باسقارۋ مەن پايدالانۋ تۋرالى كەلىسىم جوباسىنىڭ نورمالارىن تالقىلاۋ جانە كەلىسۋ»، - دەدى دەپۋتات.

كونۆەنسيا تاراپتارى مىناداي مىندەتتەمەلەردى قابىلدادى:

- باسقا تاراپتارعا ايتارلىقتاي زيان كەلتىرمەۋ؛

- ترانسشەكارالىق وزەندەردى باسقارۋ بويىنشا ىنتىماقتاستىق جاساۋ؛

- سۋ اعىنىنىڭ جاي-كۇيى جانە سۋدى پايدالانۋ بويىنشا دەرەكتەر مەن اقپاراتپەن الماسۋ.

اتالعان شارالار ترانسشەكارالىق سۋ اعىندارى بويىنشا ءتيىمدى ىنتىماقتاستىقتىڭ كەپىلى بولادى.

اۆتور

رۋسلان عابباسوۆ