سەنات ۇلتتىق قوردان بالالارعا اقشا اۋدارۋ تۋرالى زاڭدى ماجىلىسكە قايتاردى
بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۇلتتىق قوردان بالالارعا ارنالعان قاراجاتتى ەسەپتەۋ، تولەۋ جانە پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جەكەلەگەن باپتارى ماقۇلدانبادى. بۇل رەتتە، اتالعان باپتاردىڭ جاڭا رەداكسياسىن ۇسىنا وتىرىپ، قۇجات ماجىلىسكە قايتارىلدى، دەپ حابارلايدى Kazinform ءتىلشىسى.

«مەملەكەت باسشىسى 2022 - جىلعى 1- قىركۇيەكتەگى قازاقستان حالقىنا ارناعان جولداۋىندا «ۇلتتىق قور - بالالارعا» اتتى جوبانى ىسكە اسىرۋدى ۇسىندى. بۇل جوبا - وسكەلەڭ ۇرپاقتىڭ ەرەسەك ومىرگە ناقتى جولداما الۋىنا باعىتتالعان العاشقى قادام. ۇلتتىق بايلىقتىڭ حالىقتىڭ مۇددەسىنە جۇمسالۋى جانە ونىڭ يگىلىگىن كورۋى - «ادىلەتتى مەملەكەتتى» قۇرۋدىڭ ناقتى كورىنىسى دەپ ايتۋعا تولىق نەگىز بار. قازىر رەسمي دەرەكتەر بويىنشا ەلىمىزدە 18 جاسقا دەيىنگى بالالاردىڭ جالپى سانى شامامەن 6,7 ميلليون ادامدى قۇراپ وتىر. ۇسىنىلعان زاڭعا سايكەس ۇلتتىق قوردىڭ ينۆەستيتسيالىق تابىسىنىڭ 50 پايىزىن 18 جاسقا دەيىنگى بارلىق جاستاعى بالالار اراسىندا تەڭ ءبولۋ كوزدەلگەن. ۇلتتىق قور قاراجاتىن ءبىلىم الۋعا جانە تۇرعىن ءۇي جاعدايىن جاقسارتۋعا باعىتتالعان ناقتى ەكى ماقساتتا پايدالانۋ ۇسىنىلدى»، - دەدى سەناتور بەكبول ورىنباساروۆ زاڭدى ءبىرىنشى وقىلىمدا ماقۇلداۋ كەزىندە.
ونىڭ ايتۋىنشا، ءبىلىم الۋ باعىتى بويىنشا قاراجاتتى جوعارعى وقۋ ورىندارىنىڭ اقىسىن تولەۋگە نەمەسە مەملەكەتتىك ءبىلىم بەرۋ جيناقتاۋ جۇيەسىنە اۋدارۋعا مۇمكىندىك بەرىلەدى.
شەتەلدىك وقۋ ورنىندا وقۋ اقىسىن تولەۋگە قاراجاتتى پايدالانۋ شەكتەلمەيدى.
«ال تۇرعىن ءۇي ساتىپ الۋ نەمەسە تۇرعىن ءۇيدىڭ جاعدايىن جاقسارتۋ باعىتى بويىنشا قاراجاتتى پايدالانۋ تەك قازاقستان رەسپۋبليكاسى اۋماعىندا عانا رۇقسات ەتىلەدى. سونىمەن قاتار، بۇل قاراجاتتى باستاپقى جارنا، يپوتەكالىق قارىزدار بويىنشا تولەم رەتىندە اۋدارۋىنا مۇمكىندىك بەرىلەدى. 18 جاسقا تولعان كەزدە جيناقتالعان قاراجات بالانىڭ مەنشىگى بولادى، ءوزى اشقان ۋاكىلەتتى وپەراتورلارداعى شوتتارعا جىبەرىلەدى. سونداي- اق، قاراجاتتى الۋشىلار رەتىندە زاڭدى وكىلدەر مەن مۇراگەرلەر دە بولا الادى. بالا 18 جاسقا تولعاننان كەيىن شوتتاعى قاراجات 10 جىل بويى ساقتالاتىن قۇقىق بەرىلەدى. شوتتاعى قاراجات 10 جىل ىشىندە تالاپ ەتىلمەگەن جاعدايدا، سول ادامنىڭ زەينەتاقى شوتىنا اۋدارۋ مۇمكىندىگى بار»، - دەدى دەپۋتات.
ايتا كەتەيىك، قازاقستان رەسپۋبليكاسى ازاماتتىعىنان ايىرىلعان نەمەسە اۋىسقان كەزدە تولەمدەرگە تالاپ قويۋ قۇقىعى جويىلادى.
شوتتاعى قاراجاتتىڭ ماقساتتى پايدالانىلۋىن ساقتاۋ ءۇشىن جوبانىڭ وپەراتورى رەتىندە «ءبىرىڭعاي جيناقتاۋشى زەينەتاقى قورى» اكسيونەرلىك قوعامىن ايقىنداۋ جوسپارلانىپ وتىر.
سونىمەن قاتار، اتالعان زاڭدى ەكىنشى وقىلىمدا قاراۋ بارىسىندا سەناتورلار ءبىرقاتار تۇزەتۋ ەنگىزىپ، قۇجاتتى ماجىلىسكە قايتارۋ تۋرالى شەشىم جاسادى.
وسى ورايدا زاڭنىڭ كەيبىر ەرەجەلەرىن ءىشىنارا سايكەستەندىرۋ ەسكەرىلگەن.
مۇنىمەن قوسا، ۇلتتىق ءال- اۋقات قورىنىڭ جالعىز اكسيونەرىنىڭ قۇزىرەتىن رەگلامەنتتەيتىن قايتالاناتىن نورمالاردى الىپ تاستاۋ قاراستىرىلدى.
«قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» كونستيتۋتسيالىق زاڭنىڭ قولدانىلۋى توقتاتىلۋىنا بايلانىستى «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى» زاڭنىڭ نورمالارىنا سايكەس كەلتىرۋ قامتىلعان.
«بانكتەر مەن سالىمشىلار اراسىندا داۋلى جاعدايلاردىڭ تۋىنداۋ تاۋەكەلدەرىن بولدىرماۋ ماقساتىندا پايدالانىلماعان نىسانالى جيناقتاردى تولەۋ قاراجاتىن بانكتىك شوتتاردان ب ج ز ق شوتتارىنا ا ق ش دوللارىمەن اۋدارۋ كەزىندە «اۋدارىم كۇنىنە» ەمەس، «اۋدارىم ساتىنە» تەڭگەمەن ايىرباستاۋدى ەسكەرىلمەك»، - دەدى بەكبول ورىنباساروۆ.
اۆتور
رۋسلان عابباسوۆ