سەنات حالىقتىڭ كوشى-قونىنا قاتىستى زاڭدى ماجىلىسكە قايتاردى

استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالدى. سەنات زاڭنىڭ جەكەلەگەن باپتارىن جاڭا رەداكسيادا ۇسىنىپ، ونى ماجىلىسكە قايتاردى.

پارلامەنت دەپۋتاتتارىنىڭ باستاماسىمەن ازىرلەنگەن زاڭ حالىقتىڭ كوشى- قونى جانە قىلمىستىق- اتقارۋ جۇيەسى سالاسىنداعى زاڭنامانى جەتىلدىرۋگە باعىتتالعان.

«قاراستىرىلىپ وتىرعان زاڭ سەنات دەپۋتاتتارى، مۇددەلى مەملەكەتتىك ورگانداردىڭ قاتىسۋىمەن 10 جۇمىس توبىنىڭ، باس كوميتەتتىڭ كەڭەيتىلگەن وتىرىستارىندا جان- جاقتى تالقىلانىپ، قاراستىرىلدى.

زاڭدى تالقىلاۋ جانە ونى ەكىنشى وقىلىمعا دايىنداۋ بارىسىندا زاڭدى جەتىلدىرۋدى كوزدەيتىن ماڭىزدى وزگەرىستەر مەن تولىقتىرۋلار ەنگىزىلدى. بارلىق ۇسىنىستار مەن ەسكەرتۋلەر 11 تۇزەتۋدەن تۇراتىن سالىستىرمالى كەستەگە جيناقتالىپ، سەناتورلاردىڭ نازارلارىڭىزعا ۇسىنىلىپ وتىر. ولاردى اتاپ ايتاتىن بولساق، قۇقىقتىق قايشىلىقتى بولدىرماۋ ماقساتىندا جەر كودەكسىنە قونىس اۋدارۋشىلارعا كونكۋرستان تىس تارتىپپەن شارۋا نەمەسە فەرمەر قوجالىعىن جۇرگىزۋ ءۇشىن بەرىلەتىن جەر ۋچاسكەلەرىنىڭ مەرزىمدەرىنە قاتىستى تولىقتىرۋلار ەنگىزىلدى. سونىمەن قاتار، ق ر قىلمىستىق كودەكسى 428-1-بابىنىڭ ەكىنشى بولىگى بويىنشا قىلمىستىق- اتقارۋ جۇيەسىنىڭ، تەرگەۋ يزولياتورلارىنىڭ، ۋاقىتشا ۇستاۋ يزولياتورلارىنىڭ قىزمەتكەرلەرى ءوزىنىڭ قىزمەتتىك جاعدايىن پايدالانا وتىرىپ، قىلمىس جاساعان جاعدايدا ەكى جىلدان بەس جىلعا دەيىنگى مەرزىمگە باس بوستاندىعىنان ايىرۋ تۇرىندەگى قىلمىستىق جاۋاپتىلىق قاتاڭداتىلىپ، جازانىڭ بالاما تۇرلەرى الىنىپ تاستالدى»، - دەدى سەناتور سوۆەتبەك مەدەبايەۆ.

مۇنىمەن قوسا، بەينەباقىلاۋ جۇيەلەرىن قاساقانا جويعانى نەمەسە بۇلدىرگەنى ءۇشىن قىلمىستىق جاۋاپتىلىقتىڭ ەنگىزىلۋىنە بايلانىستى قازاقستان رەسپۋبليكاسىنىڭ قىلمىستىق-اتقارۋ كودەكسىنە بەينەباقىلاۋ جۇيەسى ۇعىمىن ەنگىزۋ بولىگىندە تۇزەتۋلەر جاسالدى.

«حالىقتىڭ كوشى-قونى تۋرالى» ق ر زاڭىنا زاڭناما تالاپتارىنىڭ ساقتالۋىن مەملەكەتتىك باقىلاۋ تۋرالى دەربەس تاراۋدىڭ ەنگىزىلۋىنە بايلانىستى زاڭنىڭ جەكەلەگەن نورمالارى ق ر كاسىپكەرلىك كودەكسىنىڭ جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بيزنەس جۇرگىزۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ نورمالارىنا سايكەس كەلتىرىلدى.

«سونىمەن قاتار، وسى زاڭمەن، اۋىر نەمەسە اسا اۋىر قىلمىستار جاساعان شەتەلدىكتەردىڭ قازاقستان رەسپۋبليكاسىنا كەلۋىنە تىيىم سالاتىن نەگىزدەر كەڭەيتىلىپ وتىر. وسىعان بايلانىستى قىلمىستىق-پروتسەستىك كودەكستىڭ نورمالارىنا سايكەس كەلتىرۋ ماقساتىندا، «شەتەلدىكتەردىڭ قۇقىقتىق جاعدايى تۋرالى» جانە «حالىقتىڭ كوشى- قونى تۋرالى» ق ر زاڭدارىنا ءتيىستى تولىقتىرۋلار ەنگىزىلدى»، - دەدى سەناتور.

اۆتور

رۋسلان عابباسوۆ