سەنات ءتوراعاسى: قازاق تىلىندەگى قۇجاتتاردا قاتەلىك بولماۋى ءتيىس

استانا. KAZINFORM - حالىقارالىق كەلىسىمدەردە قازاق تىلىندەگى ماتىندە قاتەلىك بولماۋى ءتيىس. بۇل جونىندە سەناتتىڭ جالپى وتىرىسىندا پالاتا ءتوراعاسى ماۋلەن اشىمبايەۆ قازاقستان مەن وزبەكستاننىڭ ەكولوگيا سالاسىنداعى ىنتىماقتاستىعى تۋرالى كەلىسىمدى تالقىلاۋ بارىسىندا ايتتى.

وتىرىس كەزىندە اتالعان قۇجاتتىڭ قازاق تىلىندەگى ماتىنىندە قاتەلىكتەر كەتكەنى بەلگىلى بولدى. سەنات ءتوراعاسى مۇنداي ولقىلىققا جول بەرۋگە بولمايتىنىن باسا ايتتى.

«قازاق تىلىندەگى قۇجاتتاردا قاتەلەردىڭ كەزدەسۋى بۇگىن پايدا بولعان ماسەلە ەمەس. بۇل پروبلەمانى دەپۋتاتتارىمىز دا ۇنەمى كوتەرىپ جۇرەدى. سول سەبەپتى، قازىرگى تاڭدا قازاق تىلىندەگى ماتىننەن قاتە جىبەرىپ، ونى قايتا تۇزەتۋ ورىنسىز»، - دەدى م. اشىمبايەۆ.

سونداي-اق ول قازىرگى تاڭدا ەلىمىزدە مەملەكەتتىك ءتىلدىڭ مارتەبەسى نىعايىپ، وسى سالادا كاسىبي مامانداردىڭ قاتارى ارتقانىنا نازار اۋداردى. سوندىقتان سەنات ءتوراعاسى بۇل سالادا ءتيىستى ماماندارمەن جۇمىستى كۇشەيتۋ كەرەك ەكەنىن ايتتى.

«بۇگىندە شەت تىلدەردەگى ىرگەلى عىلىمي ەڭبەكتەردى قازاق تىلىنە اۋدارىپ جۇرگەن بىلىكتى ماماندارىمىز بار. سوڭعى جىلداردا ولار بەلسەندى جۇمىس ىستەپ كەلەدى. ونى ءبارىمىز كورىپ وتىرمىز. سوندىقتان بىزدە ءتۇرلى تەرميندەرمەن جۇمىس ىستەيتىن، قالىپتاسقان ماماندار جەتكىلىكتى دەپ ايتۋعا ابدەن بولادى. سول سەبەپتى، قۇجاتتاردا قازاق تىلىندەگى ماتىندە قاتەلىك بولماۋعا ءتيىس. ال، حالىقارالىق كەلىسىمدەردە بۇعان مۇلدەم جول بەرۋگە بولمايدى. سوندىقتان ءتيىستى ۆەدومستۆو وسى ماسەلەدەن قورىتىندى شىعارىپ، كاسىبي ماماندارمەن جۇمىس ىستەۋگە ءتيىس. الداعى ۋاقىتتا مۇنداي ولقىلىق قايتالانبايدى دەپ سەنەمىز»، - دەدى ماۋلەن اشىمبايەۆ.

ايتا كەتەيىك، بۇگىن پالاتا وتىرىسىندا سەناتورلار «قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ەكولوگيا جانە قورشاعان ورتانى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭدى قاراپ، ماقۇلدادى.

اۆتور

رۋسلان عابباسوۆ