سەمەيدە 5 مەديتسينالىق نىسان سالۋ جوسپارلانعان

استانا. KAZINFORM - وسى جىلى اباي وبلىسىنىڭ دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن نىعايتۋعا 2,8 ميلليارد تەڭگە باعىتتالدى. بۇل تۋرالى وسى ءوڭىردىڭ اكىمى نۇرلان ۇرانحايەۆ ءمالىم ەتتى.

«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىس بويىنشا 65 العاشقى مەديتسينالىق- سانيتارلىق كومەك نىسانىن سالۋ جوسپارلانعان. جىل سوڭىنا دەيىن 64 نىساندى پايدالانۋعا بەرۋ كوزدەلىپ وتىر. ونىڭ 8- ءى قازىردىڭ وزىندە پايدالانۋعا بەرىلدى. كەشەندى جوسپارعا سايكەس سەمەيدە 100,4 ميلليارد تەڭگەگە 5 مەديتسينالىق نىسان سالۋ جوسپارلانىپ وتىر. قازىرگى كەزدە ينۆەستور ەسەبىنەن جوبالىق-سمەتالىق قۇجاتتار ازىرلەنىپ جاتىر»، - دەدى ن. ۇرانحايەۆ ورتالىق كوممۋنيكاتسيالار قىزمەتىندەنى باسپا ءسوز ءماسليحاتىندا.

وبلىس اكىمى بىلتىر كوكپەكتى اۋىلىندا گەمودياليز ورتالىعى اشىلعانىن ەسكە سالدى. بيىل اتالعان ورتالىقتار ءۇرجار مەن اقسۋاتتا اشىلدى. سول سياقتى بيىل جارما مەن ماقانشى اۋداندارىندا كومپيۋتەرلىك تاموگرافتار قويىلادى.

«سەمەيدەگى جەدەل مەديتسينالىق جاردەم اۋرۋحاناسى جاساندى قان اينالىم اپپاراتىمەن جابدىقتالدى. ول جۇرەك اۋرۋلارى كەزىندە قان اينالىمىن تولىق توقتاتىپ، جۇرەككە اشىق وتا جاساۋعا مۇمكىندىك بەرەدى. جالپى، وسى جىلى دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن نىعايتۋعا 2,8 ميلليارد تەڭگە باعىتتالدى»، - دەدى ول.

بۇدان بۇرىن حابارلانعانداي، اباي وبلىسىنىڭ اكىمى وڭىردەگى جاڭا مەكتەپتەردىڭ قۇرىلىسىنا تۇسىنىك بەردى.

اۆتور

رۋسلان عابباسوۆ