ەسكەرتۋ: الماتىدا كۇن 36 گرادۋسقا دەيىن ىسيدى

الماتى. KAZINFORM - الماتى قالالىق توتەنشە جاعدايلار دەپارتامەنتى اپتاپ ىستىققا بايلانىستى تۇرعىندارعا ەسكەرتۋ جاسادى.

«قازگيدرومەت» سينوپتيكتەرىنىڭ مالىمەتىنشە، 26-ماۋسىم كۇنى الماتىدا سىناپ باعاناسى 36 گرادۋسقا دەيىن كوتەرىلەدى.

وسىعان بايلانىستى الماتى قالاسى توتەنشە جاعدايلار دەپارتامەنتى تومەندەگى قاۋىپسىزدىك شارالارىن ساقتاۋدى ۇسىنىپ وتىر:

- كۇن ساۋلەسى تىكەلەي تۇسەتىن جەرلەردە مۇمكىندىگىنشە از بولۋعا تىرىسىڭىز؛

- ساعات 12:00- دەن 16:00- گە دەيىنگى ۋاقىتتا كۇننىڭ ساۋلەسى بەلسەندى بولاتىنىن ۇمىتپاڭىز. دەنەنى كۇن ساۋلەسىنەن قورعاپ، جابىق كيىم كيۋگە تىرىسىڭىز جانە كۇننەن قورعايتىن سىقپا مايلار قولدانىڭىز؛

- الكوگولدى ىشىمدىك ىشپەڭىز - الكوگول ىستىقتا اعزاعا تەز اسەر ەتەدى جانە دەنە جوعارى تەمپەراتۋراعا سەزىمتال بولادى؛

- سۇيىقتىقتى (سالقىنداتىلعان سۋ، مينەرالدى سۋ) مۇمكىندىگىنشە كوپ ىشۋگە تىرىسىڭىز؛

- دەنەگە سالماق تۇسىرمەڭىز. كۇشتى جۇكتەمە ىستىقتا جىلۋ الماسۋدى ارتتىرادى دا اعزانى سۋسىزدانۋعا اكەلىپ سوقتىرادى؛

- كولىكپەن ۇزاق ساپارلارعا شىقپاعان ابزال.

اۆتور

الما مۇقانوۆا