سۋديا بيشىمبايەۆتىڭ قورعاۋشىسىنا ەسكەرتۋ جاسادى
استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ەكس-مينيستر قۋاندىق بيشىمبايەۆقا قاتىستى سوت وتىرىسى جالعاسىپ جاتىر.
سوت وتىرىسى باستالا سالا، بيشىمبايەۆتىڭ قورعاۋشىلارى ب ا ق پەن الەۋمەتتىك جەلىدە قىلمىستىق ءىستىڭ ماتەريالدارى جاريالانىپ جاتقانىنا شاعىمدانىپ، سوتتان شارا قولدانۋدى سۇرادى. ءبىراق مەملەكەتتىك ايىپتاۋشى سوت وتىرىسى تىكەلەي ەفيردە ءوتىپ جاتقانىن، سوندىقتان بۇل ارىز نەگىزسىز ەكەنىن ايتتى. ءتىپتى، سۋديا قورعاۋشىلارعا ەسكەرتۋ جاسادى. ولار سوتتى جانە پروتسەسكە قاتىسۋشىلاردى اداستىردى دەپ تانىلدى.
تارقاتا كەتسەك، بيشىمبايەۆتىڭ قورعاۋشىلارى سوت ىسىنەن وقيعا ورنىنان كەيبىر فوتوسۋرەتتەردى كورسەتۋ تۋرالى ءوتىنىش جاساعان بولاتىن. قورعاۋشى بۇل فوتولاردى سوتقا قاتىسۋشىلاردىڭ بارلىعىنا كورسەتتى. دەسە دە، زارداپ شەككەن تاراپتىڭ ادۆوكاتى بيشىمبايەۆتىڭ ادۆوكاتتارى سوت پروتسەسىندە قولدانعان فوتوسۋرەتتەر 2024 -جىلدىڭ 28-ناۋرىزىندا تۇسىرىلگەنىن، وقيعانىڭ ءوزى 2023 -جىلدىڭ 9-قاراشاسىندا بولعانىنا نازار اۋداردى.
«ءسىز سۋرەتتەردى قىلمىس بولعان جەردى تەكسەرۋ اكتىسىنەن الىنعانىن ايتىپ، سوتتى جانە پروتسەستىڭ باسقا قاتىسۋشىلارىن اداستىردىڭىز. ءىس جۇزىندە ءسىز باسقا فوتوسۋرەتتى كورسەتتىڭىز. سوتتى اداستىرعانىڭىز ءۇشىن سوت ءىس بويىنشا تۇپكىلىكتى شەشىم شىعارعان كەزدە ءتيىستى شارالاردى قابىلدايدى»، - دەدى سۋديا ايجان قۇلبايەۆا.
ەسكە سالساق، 2023 -جىلى 9 قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.
وتكەن جىلى 15-قاراشادا وتكەن كەڭەستە مەملەكەت باسشىسى قاسىم- جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.
27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى. 29-ناۋرىزداعى سوت وتىرىسىندا مارقۇم سالتانات نۇكەنوۆانىڭ اعاسى ايتبەك امانگەلدى كۋاگەر رەتىندە جاۋاپ بەرىپ، قۋاندىق بيشىمبايەۆ پەن سالتانات نۇكەنوۆانىڭ اراسىنداعى العاشقى ۇرىس- كەرىستەر قالاي باستالعانى تۋرالى مالىمەتتەر ايتتى جانە مارقۇمنىڭ بەت- الپەتى كوگەرگەن سۋرەت كورسەتتى.
اۆتور
ورالحان قوجانوۆ
