ساۋساقتارىڭىز ساۋلىعىڭىز تۋرالى سىر شەرتەدى
استانا. قازاقپارات - كوزگە، قولعا، الاقان مەن ساۋساقتاعى وزگەرىستەرگە قاراپ تا دەنساۋلىعىڭىزداعى وزگەرىستەردى انىقتاۋعا بولادى. ەمشىسى، دارىگەر بولسىن، جالپى كوزىقاراقتى شيپاگەر قاۋىمنىڭ كادەگە جاراتىپ جۇرگەن بۇل بەلگىلەرى قالاي، قايسىسى قانداي «حابار ايتادى»، زەر سالىپ كورەيىك.
قولىڭىز قىسى-جازى ءبىر جىلىمايتىن بولسا وندا اياق-قولداعى قان اينالىمىنىڭ بۇزىلعانى.
قوس الاقانىڭىز شوققا قاقتاعانداي ۇنەمى لاپىلداپ، قىزىپ جۇرسە باۋىردىڭ ۋىتقا قارسى «قايراتىنىڭ» كەمي باستاعانى.
الاقانىڭىز قاراپتان-قاراپ تەرشىپ، دىمدانىپ، ايتپەسە قۇرعاپ، بوزارىپ جۇرسە قالقانشا بەز جۇمىسىنداعى اقاۋدىڭ سالدارى.
قولىڭىزدىڭ تەرىسى اق جارعاقتانىپ، سىدىرىلىپ تۇسە باستاسا تانىڭىزدە A دارۋمەنى مەن D دارۋمەنىنىڭ تاپشى بولعانى.
شىناشاعىڭىز اۋىق-اۋىق جانسىزدانىپ قالعانداي سەزىلەتىن بولسا، جۇرەك-قان تامىرى جۇيەڭىزدە اقاۋ بار.
اۋىق-اۋىق جانسىزدانۋ ۇلكەن ساۋساقتاردان بايقالسا، تىنىس جولىنداعى كەسەلدىڭ حابارشىسى.
ساۋساقتىڭ ەڭ تومەنگى، ياعني الاقانعا ۇشتاسقان تۇسىنداعى بۋىنعا تەرەڭ، كولبەۋ اجىمدەر تۇسسە سۋسامىرعا (قانت قۇرامىنىڭ ارتىقتىعىنا) شالدىعۋىڭىز عاجاپ ەمەس.
ساۋساقتارىڭىزدىڭ ۇشى قان قىزىل تۇسكە ەنسە باۋىر مەن بۇيرەكتەگى كەسەلدى اڭعارتادى.
وڭ قولداعى سۇق ساۋساق ۇشىنىڭ ەكى قاپتالى دۋىلداپ قىشي بەرسە، توق ىشەگىڭىزدى ءبىر تەكسەرتىپ الىڭىز.
سۇق ساۋساقتىڭ ىشكى جاعى اقجارعاقتانىپ تەرىسى تۇلەي بەرسە ءوت قالتاسى جۇمىسىنىڭ بۇزىلعانى.
قولىڭىز قيمىلداعاندا بىلەگىڭىز سىقىرلاسا كالسي تاپشىلىعىنىڭ بەلگىسى. الاقان مەن ساۋساقتاعى بۇل وزگەرىستەر، ارينە، اۋرۋىڭىزدى ءوزىڭىز انىقتاپ، ءوزىڭىز ەم ىزدەۋىڭىز ءۇشىن ەمەس، دەسەدە، دارىگەرگە كورىنىپ، تەكسەرىلۋىڭىزگە ناقتى سەبەپتىڭ بولعانىن اڭعارتادى، دەپ جازادى massaget.kz.
