سارى وزەكتەگى سارباز ءولىمى: رەسمي حابارلامادا نە ايتىلعان
استانا. KAZINFORM - قۇرلىق اسكەرلەرىنىڭ باسپا ءسوز قىزمەتى جەتىسۋ وبلىسى سارىوزەك گورنيزونىنداعى سارباز ولىمىنە قاتىستى رەسمي اقپارات تاراتتى.

- بيىل 14-قاڭتاردا سارى وزەك گارنيزونىندا جاۋىنگەرلىك دايىندىق بويىنشا دالالىق وقۋ-جاتتىعۋ كەزىندە قارۋدى قولدانۋ ەرەجەسىن بۇزۋ سالدارىنان قاتارداعى جاۋىنگەر ق. وق جاراقاتىن الىپ قازا تاپتى، - دەلىنگەن حابارلامادا.
اتالعان فاكتى بويىنشا قىلمىستىق ءىس قوزعالدى. قازىر وقيعانىڭ ءمان-جايى انىقتالىپ، تەرگەۋ امالدارى ءجۇرىپ جاتىر. سونداي-اق وقيعا ورنىندا قۇرلىق اسكەرلەرىنىڭ باس قولباسشىسى باستاعان ارنايى كوميسسيا جۇمىس ىستەپ جاتىر.
- قىزمەت بارىسىندا سارباز ءوزىن وڭ جاعىنان كورسەتتى. اسكەري ءبولىم قولباسشىلىعىنا قاندايدا ءبىر ارىز، شاعىم ايتقان ەمەس. قىزمەتتىك مىندەتتەرىن تولىق كولەمدە ورىندادى. اتا-انا مەن تۋعان-تۋىسقانداردىڭ قايعىسىن، ارينە جاقسى تۇسىنەمىز، ولاردىڭ قايعىلارىنا ورتاقپىز. ءار كوماندير ءۇشىن دە جاۋىنگەردىڭ قازاسى قايعىلى جايت. قۇرلىق اسكەرلەرىنىڭ قولباسشىلىعى اسكەري قىزمەتشىنىڭ وتباسى مەن جاقىندارىنا قايعىسىنا ورتاقتاسىپ كوڭىل ايتادى. ولارعا بارلىق قاجەتتى كومەك كورسەتەدى، - دەپ سەندىردى قۇرلىق اسكەرلەرىنەن.
ايتا كەتەيىك، اتالعان ءىستىڭ ءمان-جايىن ءبىلۋ ءۇشىن ءبىزدىڭ اگەنتتىك قورعانىس مينيسترلىگىنە رەسمي ساۋال جولدادى.
كەشە سارىوزەك گورنيزونىندا قاتارداعى جاۋىنگەر مەرت بولعانىن حابارلاعان ەدىك.
داۋلەت ىزتىلەۋ
اۆتور