سارى وزەكتە ابايسىزدا وق تيگەن اسكەري قىزمەتشىنى اۋرۋحاناعا اپارماي، پاتەردە ۇستاعان
سارى وزەك. KAZINFORM - جەتىسۋ وبلىسىنىڭ سارىوزەك اۋىلىندا 19 جاستاعى اسكەري قىزمەتشىگە وق ءتيىپ، اۋرۋحاناعا ءتۇستى. وقيعا 2 -قىركۇيەك كۇنى بولعان. اتالعان فاكت بويىنشا قىلمىستىق ءىس قوزعالدى.
وق ءتيىپ جارالانعان اسكەري قىزمەتكەر - تەمىربەك مىڭجاساروۆ. 19 جاستاعى كىشى سەرجانت سارى وزەك گارنيزونىنداعى اسكەري بولىمدە جۇمىس ىستەگەن.
ول سول جەردە وتان الدىنداعى بورىشىن وتەپ، ءبىر جىل بۇرىن عانا كەلىسىمشارتپەن اسكەري قىزمەتكە قابىلدانىپتى. قازىر ول رەسمي ەڭبەك دەمالىسىندا.
«2 -قىركۇيەك كۇنى قاۋىپسىزدىك شارالارىن ساقتاماعاننان اسكەري قىزمەتشى جاراقات الدى. قاتەلەسپەسەم ول دۇيسەنبى مە، سەيسەنبى مە ەڭبەك دەمالىسىنا شىققان. تەرگەۋ امالدارى ءجۇرىپ جاتۋىنا بايلانىستى باسقا اقپارات بەرە المايمىن»، - دەيدى 12740 اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى نۇرعالي اقىلبەكوۆ.
تەمىربەك مىڭجاساروۆتىڭ وڭ قولى جارالانىپتى. وق ونىڭ بىلەگىن تەسىپ وتكەن. تۋىستارىنىڭ ايتۋىنشا، كىشى سەرجانتتى ارىپتەسى بايقاۋسىزدا اتىپ العان.
الايدا، اسكەري بولىمدەگىلەر ۇلىمنىڭ جاراقات العانىنا قاراماستان اۋرۋحاناعا اپارماي، پاتەردە تىعىپ ۇستاپ وتىرعان دەيدى باقىتبەك قاسىمبەكوۆ.
«بارعان كەزدە بالامدى اسكەري تەرگەۋ باسقارماسىنىڭ جىگىتتەرىنىڭ شتابىنان تاۋىپ وتىرمىن، ول جىگىتتەر بالامدى 3- ءۇي، 3-پاتەردەن تاۋىپ العان. بالام تاراقان قاپتاپ جۇرگەن، بومجداردىڭ مەكەنىندەي جەردە جاتقان. تاراقاننان باسقا جەيتىن ەشتەڭە جوق ول جەردە، انتيسانيتاريا، ەشقانداي تازالىق جوق. السىرەگەننەن بالام باسىن كوتەرە الماي تۇر. اسكەري تەرگەۋ باسقارماسىنداعىلار تاۋىپ بەرمەگەندە بالامنىڭ سۇيەگىن دە تاپپاي قالاتىن جاعداي بولىپ تۇر ەكەن»، - دەيدى اسكەري قىزمەتشىنىڭ اكەسى باقىتبەك قاسىمبەكوۆ.
قازىر مىڭجاساروۆ ەسكەلدى اۋداندىق اۋرۋحاناسىندا ەم قابىلداپ جاتىر. اكەسىنىڭ ايتۋىنشا ول رەسمي تۇردە ەڭبەك دەمالىسىندا ەكەنىنەن بەيحابار.
ەسكە سالا كەتەيىك، بۇعان دەيىن ارىس قالاسىندا ءتورت اسكەري قىزمەتشى جارالانعانىن جازعانبىز.
اۆتور
ايبەك قۇتتىبەك
