سارى اعاشتا بانان مەن پاپايا ءپىستى
تۇركىستاندىق شارۋا تروپيكالىق جەمىستەردى ءوسىرىپ جاتىر، دەپ حابارلايدى Kazinform.
سارى اعاشتاعى «Agrotur» شارۋا قوجالىعىنىڭ جىلىجايىندا وسىرىلگەن تروپيكالىق جەمىستەر ءونىم بەرە باستادى. قىستا بانان مەن پاپايا ءپىستى. ال، كيۆي مەن قۇلپىناي، زايتۇن مەن روزماريننىڭ دە جەمىس بەرەتىن كۇندەرى جاقىنداپ قالعان.
«وزبەكستاندىق تانىس ادامدار ارقىلى بانان مەن پاپايانىڭ كوشەتتەرىن ەكۆاتوردان الدىردىم. باسىندا 4 ءتۇپ بانان، 2 ءتۇپ پاپايا وتىرعىزدىق. قازىر بانان 20 ءتۇپ بولدى. پاپايادا جايمەن كوبەيىپ كەلەدى. ازىرگە ساتاتىنداي ءونىم الىپ جاتقان جوقپىن. تەك بالالارىم مەن نەمەرەلەرىم جانە وسىنداعى جۇمىسشىلاردىڭ جەۋىنە جەتىپ تۇر. بانان پىسكەن كەزدە وزىمە ەكى- اق داناسى بۇيىردى»، - دەيدى شارۋا قوجالىق ءتوراعاسى تۇرسىن ابدۋللا ۇلى.
قازىر شارۋانىڭ اۋلاسىندا ءوسىپ تۇرعان تروپيكالىق جەمىستەرگە قىزىعۋشىلار وتە كوپ. شارۋالار تاجىريبە الماسۋ ءۇشىن كەلسە، كاسىپكەرلەر ساتىپ الماق بولىپ حابارلاسادى. ال، كەي ادامدار سۋرەتكە ءتۇسۋ ءۇشىن ارنايى ىزدەپ كەلەدى ەكەن.
«بانان ەكى-ءۇش ايدا ءبىر رەت 20 كەلىنىڭ جوباسىندا ءونىم بەرەدى. ياعني، 1 جىلدا 100 كەلىدەي ءونىم الامىز. ال، پاپايانىڭ ەكى-ءۇش كۇندە بىرەۋى پىسەدى. بىزدە اراب ەلىندە وسەتىن قۇرما اعاشى دا بولعان. وتكەن جىلى كومىردىڭ ۋاقىتىلى جەتكىزىلمەۋىنەن جىلىجايداعى ونىمدەرىمىزدى ءۇسىپ كەتتى. سول كەزدە كوگەرىپ تۇرعان قۇرما اعاشىن قۋراتىپ الدىق»، - دەيدى شارۋا.
جالپى تۇرسىن ابدۋللا ۇلى تروپيكالىق جەمىس ءوسىرۋدى 2017 -جىلدارى قولعا العان. العاشقى كەزدە تروپيكالىق جانە ەكزوتيكالىق جەمىستەرگە ارناپ ارنايى جىلىجاي سالدى. كوشەتتەردى كۇتىپ باپتاۋ جۇمىستارىن اتقاردى. ال، جەمىسىن 5 جىلدان سوڭ كورە باستادى.
«ەلىمىزگە شەتتەن كەلەتىن ونىمدەردى ءوز جەرىمىزدە ءوسىرىپ كورۋگە نيەت ەتتىم. ءتىپتى، الدىما «وسىرەمىن» دەگەن تالاپ تا قويدىم. 12 سوتوك جەرگە جىلىجاي سالىپ، تاجىريبە الاڭىن جاسادىم. جوسپارىم جايمەن جۇزەگە اسۋدا. تەك كۇن ىستىق ايماقتا وسەتىن جەمىستەر، سارى اعاش توپىراعىنا دا جەرسىندى. الداعى ۋاقىتتا بانان مەن پاپايانىڭ كوشەتتەرىن كوبەيتۋدى جوسپارلاپ وتىرمىن» - دەيدى ول.
بۇگىندە «Agrotur» شارۋا قوجالىعى اۋماعىنداعى 4 گەكتار جەردە قيار مەن قىزاناقتان باستاپ كوپتەگەن باقشا ءونىمى وسىرىلەدى. ولاردىڭ ىشىندە ءزايتۇن مەن روزمارين، كيۆي مەن قۇلپىناي، انار مەن قۇرما سەكىلدى سيرەك كەزدەسەتىن جەمىستەر بار. ودان بولەك، ءبىر گەكتار جەرگە قيار مەن قىزاناق كوشەتى ەگىلگەن. اۋماعى ەكى گەكتار جەردى الىپ جاتقان الما باۋى بار. وندا دا المۇرت، شيە، ورىكتىڭ بىرنەشە ءتۇرى ءوسىپ تۇر. سونداي- اق شارۋا گوللونديالىق گۇلدەردى دە ءوسىرىپ، ساتىلىمعا شىعاراۋدا. بال اراسى، بودەنە بينەسى سەكىلدى كاسىپتەرى دە قوسىمشا ءجۇرىپ جاتىر.
«تۇتىنۋشىلارىمىزدىڭ كوپشىلىگى اقتاۋ، اتىراۋ، قىزىلوردا، الماتى سەكىلدى ەل اۋماعىنان كەلەدى. بيىل گوللانديالىق گۇلدەرگە وزبەكستاننان تاپسىرىس ءتۇستى. سۇرانىس جاقسى. جالپى بۇل ءبىزدىڭ وتباسىلىق كاسىبىمىز. ۇل-قىزدارىم مەن كەلىندەرىمدە وسىندا قىزمەت اتقارادى. ودان بولەك، شارۋا قوجالىقتا 30-عا جۋىق جەرگىلىكتى تۇرعىن جۇمىسپەن قامتىلعان. ال، اگرانومدى تۇركيادان الدىردىق. ءوزىم جاس كەزىمنەن ديقانشىلىقپەن اينالىسقانمىن»، - دەيدى تۇرسىن ابدۋللا ۇلى.
اۆتور
قايرات زاينيشيەۆ
