ساربازداردى ۇرىپ-سوققان اسكەري قىزمەتشى جازادان قۇتىلىپ كەتتى

اقتوبە. KAZINFORM - اقتوبە گارنيزونىنىڭ اسكەري سوتىندا ماڭعىستاۋ وبلىسىنداعى 25/744 اسكەري ءبولىمىنىڭ قىزمەتكەرى ن. امراليەۆكە قاتىستى قىلمىستىق ءىس قارالدى. ول ساربازداردى ۇرىپ-سوققانى ءۇشىن سوت الدىندا جاۋاپ بەرگەنىمەن، جازادان قۇتىلىپ كەتتى.

اقتوبە گارنيزونىنىڭ اسكەري سوتى قىلمىستىق كودەكستىڭ «بيلىكتى اسىرا پايدالانۋ» بابى بويىنشا تۇسكەن ءىستى اشىق قارادى.

ءىس ماتەريالىنا سۇيەنسەك، 2024-جىلدىڭ 25-ناۋرىزى كۇنى ساعات 21:00-دە اسكەري شەنى بار جانە وق اتۋمەن قولداۋ روتاسىنىڭ قىزمەتكەرى ن. امراليەۆ ءوزىنىڭ رۇقساتىنسىز دالىزدە جۇرگەنى ءۇشىن قاتارداعى جاۋىنگەرلەرگە تيىسەدى. ونىمەن قويماي، جاتىن بولمەگە بارىپ، ءوز وكىلەتتىلىگىن اسىرا پايدالانىپ، بىرنەشە ساربازدى جۇدىرىعىمەن ۇرادى. سونىمەن بىرگە 2024-جىلدىڭ 29-ناۋرىزى كۇنى شامامەن ساعات 22:20-دا وق اتۋمەن قولداۋ روتاسىنىڭ كانسەليارياسىندا قاتارداعى جاۋىنگەرلەردى ناسىباي اتقانى ءۇشىن جازالاپ، ۇرادى. «ءبارىمىز ءبىرىمىز ءۇشىن، ءبىرىمىز ءبارىمىز ءۇشىن» دەپ كەيبىرىن جۇدىرىقتايدى، كەيبىرىن الاقانىمەن سالىپ قالادى.

اعا لەينەنانت ن. امراليەۆ قىزمەتتىك وكىلەتتىلىگىن اسىرا پايدالانىپ، 6 ساربازدى ۇرىپ- سوقانى ءۇشىن قىلمىستىق كودەكستىڭ 451- بابى 1 -بولىگىمەن قۇقىق بۇزۋشىلىق جاساعان. سوت وتىرىسى كەزىندە سوتتالۋشىنىڭ قورعاۋشىسى ن. امراليەۆ كىناسىن مويىنداعانىن، الايدا تاراپتار ءوزارا تاتۋلاسقانىن ايتتى.

- سوت قىلمىستىق كودەكستىڭ «تاتۋلاسۋعا بايلانىستى قىلمىستىق جاۋاپتىلىقتان بوساتۋ» بابى، قىلمىستىق- پروتسەستىك كودەكستىڭ 35- بابى 1- بولىگى 12- تارماعىنا سۇيەنىپ قىلمىستىق كودەكستىڭ 451 -بابى 1 -بولىگىندە قاراستىرىلعان قىلمىستىق جاۋاپكەرشىلىكتەن بوساتتى، - دەپ جازىلعان سوت كابينەتىندە.

ەسكە سالساق، قيالى شەكارا زاستاۆاسىندا ارىپتەسىن اتىپ، قاماۋعا الىنعان اسكەري قىزمەتشى سوتتالدى. سوت ونى 3 جىلعا باس بوستاندىعىنان ايىردى.

اۆتور

التىناي ساعىندىقوۆا