سانكت- پەتەربۋرگتە وزەنگە قۇلاعان اۆتوبۋس جۇرگىزۋشىسى قاماۋعا الىندى
ماسكەۋ. KAZINFORM - سانكت-پەتەربۋرگتىڭ وكتيابر اۋداندىق سوتى 10-مامىردا مويكا وزەنىنە قۇلاعان اۆتوبۋس جۇرگىزۋشىسى راحماتشوح كۋربونوۆتى 9 -شىلدەگە دەيىن قاماۋعا الدى، دەپ حابارلايدى DW.
ەر ادام ەكى نەمەسە ودان دا كوپ ادامنىڭ ولىمىنە اكەپ سوقتىرعان جول قوزعالىسى ەرەجەسىن بۇزدى دەپ ايىپتالۋدا. جۇرگىزۋشى جەتى جىلعا باس بوستاندىعىنان ايىرىلۋى مۇمكىن.
سوت وتىرىسىندا كۋربونوۆ ءوز كىناسىن مويىنداپ، ءوزى باسقارعان اۆتوبۋستىڭ تەجەگىشىندە اقاۋ بولعانىن مالىمدەدى. ول جاساعان ارەكەتىنە وكىنەتىنىن جەتكىزىپ، مارقۇمداردىڭ تۋىستارىنا كوڭىل ايتتى.
سول كۇنى رەسەي فەدەراتسياسىنىڭ تەرگەۋ كوميتەتى راحماتشوح كۋربونوۆقا قارسى ەكىنشى قىلمىستىق ءىس-شەتەلدىك ازاماتتاردى جالعان تىركەۋگە الۋ بويىنشا قوزعالعانىن حابارلادى. تەرگەۋشىلەردىڭ مالىمەتىنشە، ول 2024 -جىلدىڭ اقپانى مەن ناۋرىز ايلارىندا اقشالاي سىياقى الىپ، ءوز پاتەرىنە كەم دەگەندە 10 شەتەلدىك ازاماتتى جالعان تىركەگەن.
سانكت- پەتەربۋرگ ورتالىعىندا كەزەكتى اۆتوبۋس اپاتى سالدارىنان جەتى جولاۋشى قازا تاپتى، ەكەۋى اۋىر حالدە اۋرۋحانادا جاتىر. وقيعا ورنىنان تۇسىرىلگەن بەينەماتەريالدا اۆتوبۋستىڭ ۇلكەن مورسكايا كوشەسىنەن مويكا ارقىلى پوتسەلۋيەۆ كوپىرىنە وڭعا بۇرىلىپ، قارسى جولاققا شىعىپ، جولاۋشىلار كولىگىن سوعىپ، سوسىن قورشاۋدى بۇزىپ ءوتىپ، وزەنگە قۇلاعانى جانە باتىپ كەتكەنى بايقالادى.
بۇعان دەيىن حابارلاعانىمىزداي، «تاكسي» جاۋاپكەرشىلىگى شەكتەۋلى سەرىكتەستىگى اۆتوكولونناسىنىڭ باسشىسى اۆتوبۋستىڭ قۇلاۋى سالدارىنان ادام ولىمىنە قاتىسى بار دەگەن كۇدىكپەن ۇستالدى.
اۆتور
اسحات رايقۇل
