«سامسا قاتىن ەمەس، قورىقپاي ەكەۋىن ال»: الماتىدا اتىشۋلى جارناما الىنىپ تاستالدى
الماتى. KAZINFORM - الماتىدا دۇڭگىرشەكتەن تۇرعىنداردىڭ اشۋىنا تيگەن جازۋى الىنىپ تاستالدى.

قالا اكىمدىگىنىڭ مالىمەتىنە سايكەس، الەۋمەتتىك جەلىدە تاراعان «سامسا قاتىن ەمەس، قورىقپاي ەكەۋىن ال» جازۋى الاتاۋ اۋدانىندا ورنالاسقان تاماقتانۋ ورنىندا ىلىنگەن.
- الاتاۋ اۋدانى اكىمدىگىنىڭ ماماندارى شوعان ابىز كوشەسى، 406/1- ءۇي مەكەنجايىندا ورنالاسقان قوعامدىق تاماقتانۋ ورنىنىڭ كورنەكى اقپاراتتارىنا مونيتورينگ جۇرگىزدى. كاسىپكەرلىك سۋبەكتى قىزمەتكەرلەرىنە دەرەكتەمەلەر مەن كورنەكى اقپاراتتاردىڭ ءتىلى جانە تۇتىنۋشىلارعا قىزمەت كورسەتۋ بارىسىندا تىلدەردىڭ قولدانىلۋى جونىندە ءتۇسىندىرۋ جۇمىستارى جۇرگىزىلىپ، ادىستەمەلىك كومەك كورسەتىلدى. ناتيجەسىندە ادەبي ءتىل نورمالارىنا ساي ەمەس كورنەكى اقپارات الىنىپ تاستالدى، - دەپ حابارلادى اكىمدىكتەن.

ەسكە سالايىق، بۇعان دەيىن الماتىدا ەسىرتكى جارنامالاعان تۇرعىن سوتتالعانىن جازعانبىز.
اۆتور
دوسبول اتاجان