سامات ابىشكە شارتتى جازا كەسىلۋى زاڭدى ما - جوعارعى سوت جاۋاپ بەردى
استانا. KAZINFORM - جوعارعى سوت قىلمىستىق ىستەر جونىندەگى سوت القاسىنىڭ ءتوراعاسى نازگۇل راحمەتۋللينا سۇحباتىندا قاڭتار وقيعاسىنا بايلانىستى ايىپتالعان ۇلتتىق قاۋىپسىزدىك كوميتەتى ءتوراعاسىنىڭ بۇرىنعى ءبىرىنشى ورىنباسارى سامات ءابىشتىڭ 8 جىل شارتتى جازاعا كەسىلۋىنە بايلانىستى تۇسىنىكتەمە بەردى.

پارلامەنت پالاتالارىنىڭ بىرلەسكەن وتىرىسىنان كەيىن ب ا ق وكىلدەرى جوعارعى سوت وكىلىنەن سامات ابىشكە تاعايىندالعان جازا قانشالىقتى زاڭدى ەكەنىن سۇرادى.
«قىلمىستىق كودەكستىڭ 63-بابىندا شارتتى سوتتاۋ جازاسى قولدانىلمايتىن قىلمىستار تىزبەسى بار. بۇل جەمقورلىق قىلمىستار جانە تاعى باسقا بىرنەشە قىلمىس ءتۇرى بار. ال، شارتتى سوتتاۋ جازاسىن قولدانۋعا نەگىز بار ما، جوق پا دەگەندى ونداي شاراعا تىيىم بولماعان جاعدايدا ءار ناقتى جاعداي بويىنشا سوت شەشەدى»، - دەدى ول.
«ال قىزمەتتىك وكىلەتىن اسىرا پايدالانۋدىڭ ارتى ەلدەگى وسىنداي قيراندىعا الىپ كەلگەن ارەكەت ءۇشىن 8 جىل شارتتى جازا كەسۋ تومپاقتاۋ ەمەس پە؟» - دەپ سۇرادى ب ا ق وكىلى.
نازگۇل راحمەتۋللينانىڭ ايتۋىنشا، جازانىڭ مۇنداي ءتۇرى ەلىمىزدە ايتارلىقتاي ءجيى قولدانىلادى.
«شارتتى جازا ءىس جۇزىندە ءجيى قولدانىلادى. ويتكەنى زاڭنىڭ ارنايى بابى بار عوي. سوتتىڭ ول جازانى قولدانباۋعا قۇقىعى جوق. تاعى قايتالاپ ايتامىن، شارتتى جازا قولدانىلمايتىن قىلمىستاردىڭ تىزبەسى بار. ول - اسا اۋىر قىلمىستار، 12 جىلدان جوعارى باس بوستاندىعىنان ايىرۋ جازاسى قاراستىرىلعان قىلمىستار، جەمقورلىق قىلمىستار جانە تاعى باسقالار. ونداي تىيىم بولماسا، سوت ءار جاعدايدىڭ مانىنە قاراي شەشىم قابىلدايدى. ياعني، ادام بۇرىن سوتتالعان با، مىنەزدەمەسى قانداي، قىلمىسىمەن كەلتىرگەن شىعىندى وتەدى مە دەگەن سياقتى سۇراقتار ەسكەرىلەدى» - دەدى جوعارعى سوت وكىلى.
اۆتور
ەسىمجان ناقتىباي