دەنساۋلىق ساقتاۋ ءمينيسترى جۇكتى ايەلدەر مەن بالالارعا قاتىستى تاپسىرما بەردى

ءتيىستى تاپسىرمالار دەنساۋلىق ساقتاۋ مينيسترلىگىندە وڭىرلىك دەنساۋلىق ساقتاۋ باسقارمالارى مەن رەسپۋبليكالىق مەديسينالىق ورتالىقتار باسشىلارىنىڭ قاتىسۋىمەن وتكەن اپپاراتتىق كەڭەستە بەرىلدى. بۇل شارالار 2026- 2030 -جىلدارعا ارنالعان «قازاقستان بالالارى» تۇجىرىمداماسىن ىسكە اسىرۋ شەڭبەرىندە كوزدەلگەن.

بۇل قاۋىپ توبىنا جاتاتىن جۇكتى ايەلدەردى جەكە باقىلاۋ، بوساندىرۋ ۇيىمدارىنىڭ دايىندىعىن قامتاماسىز ەتۋ جانە بالالارعا شۇعىل مەديسينالىق كومەك كورسەتۋ ساپاسىن باقىلاۋدى كۇشەيتۋ مىندەتتەرىن قامتيدى.

- ءاربىر جۇكتى ايەل، اسىرەسە جوعارى قاۋىپ توبىنا جاتاتىن ايەل تۇراقتى مەديتسينالىق باقىلاۋدا بولۋى ءتيىس. جۇكتىلىكتى قاداعالاپ-قاراۋدىڭ جەكە جوسپارىن الدىن الا ايقىنداپ، بوساندىرۋ باعىتىن بەلگىلەپ، جاۋاپتى مامانداردى بەكىتۋ قاجەت، - دەپ اتاپ ءوتتى اقمارال ءالنازاروۆا.

مينيستر جۇكتى ايەلدەردى ۋاقتىلى ەمدەۋگە جاتقىزۋعا جانە ستاسيونارلاردىڭ شۇعىل اكۋشەرلىك- گينەكولوگيالىق كومەك كورسەتۋگە، ونىڭ ىشىندە دەمالىس جانە مەرەكە كۇندەرى دايىن بولۋىنا ەرەكشە نازار اۋداردى.

وڭىرلىك دەنساۋلىق ساقتاۋ باسقارمالارىنا جۇكتى ايەلدەردى ەمدەۋگە جاتقىزۋدان نەگىزسىز باس تارتۋ جاعدايلارىنا جول بەرمەۋ جانە مەديسينالىق باقىلاۋدىڭ ۇزدىكسىزدىگىن قامتاماسىز ەتۋ تاپسىرىلدى.

- جۇكتى ايەل مەديسينالىق ۇيىمعا جۇگىنگەن كەزدە قاجەتتى مامانداردى تارتا وتىرىپ، مەديتسينالىق كومەك سول جەردە ۇيىمداستىرىلۋى ءتيىس. اۋرۋحانانى ايەلدىڭ ءوزى ىزدەمەۋى كەرەك، كەرىسىنشە، دەنساۋلىق ساقتاۋ جۇيەسى وعان ۋاقتىلى كومەك كورسەتۋدى قامتاماسىز ەتۋى قاجەت، - دەدى مينيستر.

بەس جاسقا دەيىنگى بالالارعا جەدەل مەديسينالىق كومەك كورسەتۋ ماسەلەسىنە دە ەرەكشە نازار اۋدارىلدى. جەدەل جاردەم شاقىرىلعان كەزدە بالانىڭ جاعدايىن تولىق باعالاۋ قاجەت. كورسەتىلىمدەر بولعان جاعدايدا بالانى قوسىمشا تەكسەرۋ جانە ەمدەۋگە جاتقىزۋ ماسەلەسىن شەشۋ ءۇشىن ستاتسيونارعا جەتكىزۋ كەرەك.

مينيستر جەدەل مەديسينالىق جاردەم قىزمەتىنىڭ ءتيىستى جۇمىس الگوريتمدەرىن قايتا قاراۋدى، مەديسينا قىزمەتكەرلەرىنىڭ دايارلىعىن كۇشەيتۋدى جانە بالالاردىڭ جاعدايىنىڭ اۋىرلىعىن دۇرىس باعالاماۋ جاعدايلارىن بولدىرماۋدى تاپسىردى.

سونىمەن قاتار پەريناتالدىق ورتالىقتارداعى ينفەكسيالىق باقىلاۋ كۇشەيتىلىپ، پاتسيەنتتەردى مەديتسينالىق ۇيىمداردىڭ اراسىندا باعىتتاۋ ءتارتىبى جەتىلدىرىلەدى جانە جوعارى قاۋىپ توبىنداعى جۇكتى ايەلدەرگە جەدەل مەديتسينالىق باقىلاۋ ۇيىمداستىرىلادى.

رەسپۋبليكالىق عىلىمي ورتالىقتارعا وڭىرلەرگە پراكتيكالىق قولداۋ كورسەتۋدى كۇشەيتۋ، جاس اكۋشەر- گينەكولوگتار، نەوناتولوگتار مەن بالالار ماماندارىنا تالىمگەرلىك جۇيەسىن دامىتۋ تاپسىرىلدى. ەكى اپتا ىشىندە ورتالىقتار مەديتسينا قىزمەتكەرلەرىنىڭ بىلىكتىلىگىن ارتتىرۋ جونىندە ۇسىنىستار ۇسىنۋى ءتيىس.

ستاتسيوناردان شىققاننان كەيىن انا مەن بالاعا مەديسينالىق كومەك كورسەتۋ ماسەلەسىنە دە ەرەكشە كوڭىل ءبولىندى. مينيسترلىك پاتروناجدىق بارۋلاردىڭ ساپاسىن جانە پەرزەنتحانالار مەن ەمحانالار اراسىنداعى مەديتسينالىق باقىلاۋدىڭ ساباقتاستىعىن قامتاماسىز ەتۋگە باقىلاۋدى كۇشەيتەدى.

2026- 2030 -جىلدارعا ارنالعان «قازاقستان بالالارى» تۇجىرىمداماسى شەڭبەرىندە پروفيلاكتيكالىق كومەكتى كەڭەيتۋگە، مەديتسينالىق ينفراقۇرىلىمدى دامىتۋعا جانە بالالارعا كورسەتىلەتىن مامانداندىرىلعان كومەكتىڭ ساپاسىن ارتتىرۋعا باعىتتالعان 30 ءىس-شارانى ىسكە اسىرۋ كوزدەلگەن.

ايتا كەتەلىك مەديسينا سالاسىندا شاعىم %44 كوبەيگەنى تۋرالى جازعان ەدىك.