سالىنىپ جاتقان ۇيدەن پاتەردى قاۋىپسىز تۇردە قالاي الۋعا بولادى؟

استانا. KAZINFORM - ەلىمىزدە جىل باسىنان بەرى 4 ميلليون شارشى مەتر تۇرعىن ءۇي سالىنىپ، سوڭعى ءبىر ايدىڭ وزىڭدە 31 مىڭنان استام باسپانا ساتىلعان. ارينە بوي كوتەرىپ جاتقان تۇرعىن ءۇي نىساندارى كوپ. ءبىراق ارتىنشا قۇرىلىسى توقتاپ قالىپ جاتقاندارى دا از ەمەس.

ونەركاسىپ جانە قۇرىلىس مينيسترلىگىنىڭ مالىمەتىنشە، ەلىمىزدىڭ 8 وڭىرىندە ۇلەستىك قۇرىلىستىڭ 39 نىسانى اياقتالماي كەلەدى. سالىنىپ جاتقان ۇيدەن پاتەردى قاۋىپسىز تۇردە قالاي ساتىپ الۋعا بولادى؟

باسپانالى بولام دەگەن جانداردىڭ كوبى پاتەردى جاڭا سالىنعان نەمەسە قولدانىستاعى ۇيدەن ەمەس، بوي كوتەرىپ جاتقان تۇرعىن ۇيدەن الۋدى ءجون كورەدى. ءيا، قۇرىلىس اياقتالعان كەزدە ونىڭ قۇنى 50 پايىزعا ارتاتىنى بەلگىلى. نەگىزگى ارتىقشىلعى باعادا.. ءبىراق بىتپەگەن ۇيگە قارجى سالىپ، سان سوعىپ قالام با دەپ جۇرگەندەر دە بار.

ارينە تۇرعىننىڭ قالتاسىنداعى بارىن بەرىپ، بارماعىن تىستەپ قالعىسى كەلمەيتىنى انىق. مۇندايدا ون ويلانىپ، ءجۇز تولعانىپ جاۋاپتى قۇرىلىس سالۋشىنى تاڭداعان ءجون. ساراپشىلار وسىلاي دەيدى. ياعني، الدىمەن قۇرىلىس سالۋشىنىنىڭ ساراپتاما قورىتىندىسى بار جوبالاۋ-سمەتالىق قۇجاتتاماسىنىڭ بارىنا كوز جەتكىزۋ كەرەك. سودان كەيىن اكىمدىكتىڭ رۇقساتى نەمەسە تۇرعىن ءۇي قۇرىلىسى قورىنىڭ ۇلەسكەرلەردىڭ اقشاسىن تارتۋعا كەپىلدىگى بولۋ كەرەك دەيدى، زاڭگەر.

ارداق ابەۋوۆا، قالالىق زاڭ كونسۋلتانتتارى پالاتاسىنىڭ مۇشەسى:

- ءسىز ءۇي الۋعا كەلگەن جاعدايدا مىسالى سۇرايسىزدار: ۋستاۆىڭىز بار ما؟ جەرگە دەگەن رۇقسات قۇجاتتارىڭىز بار ما؟ ونى تەكسەرىپ كورۋ كەرەك. جانە دە ەكىنشى دەڭگەيدەگى بانكتەردە سچەتتار بولۋ كەرەك. سولاردى قاراستىرۋ كەرەك. ساتىپ الۋشى مەن ساتۋشى شارتىندا قۇرىلىستىڭ اياقتالۋ مەرزىمى جازىلادى. قۇرىلىسشىلار مەرزىمدى كەشىكتىرمەۋى ءۇشىن ساتىپ الۋشى ءوسىمپۇلدى الدىن- الا تالقىلاۋى قاجەت. سونداي-اق-قۇرىلىس كومپانياسىنىڭ مەنشىگىندە نەمەسە جالعا بەرۋىندە جەر ۋچاسكەسى بولۋىنا كوز جەتكىزۋ كەرەك.

ازامات تاجىبايەۆ، ق ر ونەركاسىپ جانە قۇرىلىس مينيسترلىگى كوميتەتىنىڭ باس ساراپشىسى:

- قۇرىلىس سالۋشى جايلى ەڭ الدىمەن، جەر قاتىناستارى باسقارماسىنان، قالا اكىمدىگىنەن بىلە الاسىز. سونداي-اق «ە-ءوتىنىش» نىسانىنان جەر ۋچاسكەسى كىمگە تيەسىلى، قانداي پايدالانۋ قۇقىعىندا ەكەندىگى جايلى اقپارات الۋ تۋرالى رەسمي ءوتىنىش جازا الاسىز. ءسىز بارلىق تولىق اقپاراتتى ازىرلەۋشىدەن سۇرايسىز، ول ونى ۇسىنۋعا مىندەتتى. ياعني قۇرىلىستىڭ اياقتالۋ مەرزىمى، جەر كىمگە راسىمدەلگەنى، وسى قۇرىلىسقا قانداي رۇقساتتار العانى تۋرالى اقپاراتتى بىلە الاسىز.

ساراپشىلار سونىمەن قاتار جوسىقسىز قۇرىلىس سالۋشىلاردىڭ تىزىمىمەن تانىسۋعا كەڭەس بەرەدى. مىسالى، بىلتىر قۇرىلىستى ساپاسىز جۇرگىزگەن جانە قۇجاتتارى تالاپقا ساي كەلمەگەن 8 كومپانيا ليتسەنزياسىمەن قوش ايتىستى. ال سالىنىپ جاتقان تۇرعىن ءۇيدىڭ ساپاسىنا كەلەر بولساق، ساتىپ الۋشى كىلتىن العاننان كەيىن ءوز باسپاناسىنان بەلگىلى ءبىر اقاۋلاردى بايقاسا، جازباشا شاعىم جولداي الادى. ولاردى قۇرىلىس كومپانياسى ەكى جىل ىشىندە جويۋعا مىندەتتى.

24.kz