سالتانات نۇكەنوۆا ءولىم اۋزىندا جاتقاندا بيشىمبايەۆ كورىپكەلگە حابارلاسقان

судья
Фото: видеодан кадр

استانا. قازاقپارات - سالتانات نۇكەنوۆا ءولىم اۋزىندا جاتقاندا قۋاندىق بيشىمبايەۆ جەدەل جاردەمگە ەمەس، كورىپكەلگە حابارلاسقان.

كەزەكتى سوتتا جاۋاپ بەرگەن ايىپتالۋشى قارالى ءتۇنى نە بولعاندىعىن ەگجەي-تەگجەي ايتىپ بەردى. كۇدىكتىنىڭ سوزىنشە، مارقۇمنىڭ دەنەسىندەگى جاراقاتتاردى ول ءوزى تايىپ جىعىلعان كەزدە العان.

سوت وتىرىسىندا ەكىنشى ايىپتالۋشى - گاستو ورتالىقتىڭ ديرەكتورى باقىتجان بايجانوۆ وعان بيشىمبايەۆ قىسىم كورسەتىپ جاتقانىن ايتتى.

بۇگىنگى سوت وتىرىسىندا قۋاندىق بيشىمبايەۆ قارالى ءتۇن بولعان وقيعانى ەگجەي- تەگجەيلى بايانداپ بەردى. ونىڭ ايتۋىنشا، «قاراشانىڭ 8-نەن 9-نا قاراعان ءتۇنى ول سالتانات نۇكەنوۆانى ولىمگە اكەلەتىندەي اۋىر سوققىلار جاساماعان. ال مارقۇمنىڭ دەنەسىنىڭ كوگەرۋى جانە ءتۇرلى جاراقات الۋ ول تايىپ جىعىلۋىنىڭ جانە دە وزگە زاتتارعا ۇرىنىپ، سوعىلۋدىڭ ناتيجەسى»، - دەيدى ەكس-مينيستر.

سوت وتىرىسىندا بيشىمبايەۆتىڭ ادۆوكاتتارى وقيعا بولعان عيماراتتىڭ سىزباسىن جانە مارقۇم ەكەۋى بولعان ارنايى بولمەنىڭ فوتو سۋرەتتەرىن ۇلكەيتىلگەن فورماتتا كورسەتۋدى سۇرادى. ءتىپتى، بۇل سۋرەتتەر تەرگەۋ ماتەريالدارىندا بارىن دا ايتىپ، كوندىردى. ءبىراق، سوت زالىنداعىلارعا كورسەتكەندە داتالاردىڭ سايكەسسىزدىگى بايقالدى. بۇل ءۇشىن سوت بيشىمبايەۆتىڭ قورعاۋشىلارىنا ەسكەرتۋ جاسادى.

ايجان كولبايەۆا، سۋديا:

- سىزدەر سوتتى جانە القابيلەردى جاڭىلىستىردىڭىزدار. بۇل فوتوسۋرەتتەردىڭ بارلىعى وقيعا بولعان جەردى قاراعان حاتتامادان الىندى دەدىڭىزدەر. شىن مانىندە مۇلدەم باسقا سۋرەتتەردى كورسەتىپ تۇرسىزدار. سول سەبەپتى مىنانىڭ بارلىعىن جيناپ الىڭىزدار. ال سوتتى جاڭىلىستىرعاندارىڭىز ءۇشىن ءىس اياقتالعان كەزدە، ۇكىم شىعاراردا ءتيىستى شارا قابىلداناتىن بولادى.

بيشىمبايەۆ مارقۇمنىڭ دەنەسىندەگى جاراقاتتار تۋرالى دا ايتتى. سول كۇنگى جانجالدا سالتانات نۇكەنوۆا اشەكەي بۇيىمدارىن شەشىپ، ول اپەرگەن زاتتاردىڭ ەشبىرى قاجەت ەمەستىگىن ايتقان.

قۋاندىق بيشىمبايەۆ، ايىپتالۋشى:

- سالتانات جىندانىپ شالبارىندا شەشكىسى كەلدى. مەن بەلدىگىنەن ۇستاپ تۇرعانمىن. نە ىستەسەڭدە ءوزىڭ ءبىل دەپ جىبەرە سالدىم. سول ساتتە ول قابىرعاعا ءبىر ۇرىلىپ، بەتىمەن ۋنيتازعا سوعىلدى. قاتتى سوققى بولدى. كەيىن ول تۇرىپ جۇرمەكشى بولدى، ءبىراق تاعى تايىپ جىعىلىپ، كافەلگە سوعىلدى. بۇنداي ساتتەر سول ءتۇنى بىرنەشە مارتە قايتالاندى. ماعان دورەكى سويلەگەن كەزدەردە قول كوتەرگەندەرىم دە بار. ءبىراق، اۋىر جاراقات اكەلەتىندەي سوققىلار جاساعان جوقپىن.

قۋاندىق بيشىمبايەۆتىڭ بۇل ايتقاندارىمەن جابىرلەنۋشى تاراپ كەلسىپەيتىندىگىن ايتتى. «سوزدەرى شىندىققا جاناسپايدى»، - دەيدى مارقۇمنىڭ اعاسى.

ايتبەك امانگەلدى، مارقۇمنىڭ اعاسى:

- 15-20 رەت باسپەن ۋنيتازعا ۇرىنۋ مۇمكىن ەمەس. بۇعان قالاي جاۋاپ بەرۋ كەرەكتىگىن دە بىلمەيمىن. بيشىمبايەۆتىڭ جەدەل جاردەم شاقىرتاتىن تالاي مۇمكىندىگى بولدى. ءبىراق ولاي جاسامادى. ونى ءوزى دە ايتىپ وتىر.

قۋاندىق بيشىمبايەۆ جەدەل جاردەم شاقىرتۋدىڭ ورنىنا كورىپكەلگە حابارلاسقان. بۇنى سوتتا ءوزى ايتتى. سوزىنشە سالتانات نۇكەنوۆا ءوزى تايىپ جىعىلىپ، جاراقاتتار العاننان سوڭ ۇيىقتاپ قالعان.

قۋاندىق بيشىمبايەۆ، ايىپتالۋشى:

- ءبىز ۇيىقتاپ كەتتىك. تۇسكە تامان سالتاناتتى وياتا المادىم. بۇل ساتتە ونىڭ سول جاق بەتى قاتتى كوگەرگەنىن اڭعاردىم. قوبالجىعان سوڭ مەن تانىس كورىپكەلگە حابارلاستىم. بارلىعىن ءتۇسىندىردىم. ول سالتانات قاتتى شارشاعان، دەمالعان سوڭ ويانادى، كەيىن ۇيگە باراسىڭدار دەدى. كورىپكەلگە سىرتتان ءبىر دۇعا وقىپ جىبەرۋىن دە سۇرادىم.

وسى ارادا بيشىمبايەۆ مەيرامحاناعا گاسترو ورتالىقتىڭ ديرەكتورى، ءوزىنىڭ بولەسى باقىتجان بايجانوۆتى دا شاقىپ العان. ءدارى-دارمەك اكەلۋىن سۇراپ، بەينە جازبالاردى ءوشىرۋدى تالاپ ەتكەن. ايتۋىنشا، جۇرتقا تانىمال بولعاندىقتان بۇل ۆيدەولار الەۋمەتتىك جەلىدە تاراپ كەتەدى دەپ قاۋىپتەنگەن. ارادا بىرنەشە ساعات وتكەننەن كەيىن قۋاندىق بيشىمبايەۆ سالتانات نۇكەنوۆانىڭ دەنەسى سالقىنداپ كەتكەنىن بايقاعان. سول كەزدە عانا جەدەل جاردەم شاقىرتقان. ءبىراق بۇل ۋاقىتتا سالتانات جان تاپسىرعان.

ايتپاقشى، سوت وتىرىسىندا باقىتجان بايجانوۆ ونى بيشىمبايەۆتان بولەك جەرگە وتىرعىزۋدى ءوتىندى. سەبەبى، اعاسى وعان قىسىم كورسەتىپ جاتىر ەكەن.

باقىتجان بايجانوۆ، ايىپتالۋشى:

- ءيا، ول ماعان ءتۇرلى قىسىم كورسەتەدى: «ولاي ايت، بىلاي ايت» دەپ.

- ايعاق بەرۋ تۋرالى ما؟

- ءيا، ايعاقتار بەرۋ تۋرالى.

وتىرىس بارىسىندا سول ءتۇنى تۇسىرىلگەن ۆيدەو جازبالار دا، فوتوسۋرەتتەر دە كورسەتىلدى. ءبىراق مارقۇمنىڭ اعاسى ايتبەك امانگەلدى ب ا ق وكىلدەرىنەن بۇل سۋرەتتەردى ەش جەردە جاريالاماۋدى ءوتىندى. ماتەريالداردى مارقۇمنىڭ اتا-اناسى دا كورمەگەن.

www.24.kz

سوڭعى جاڭالىقتار