سالۆادور داليدىڭ 61 ءتۇپنۇسقا ەڭبەگى استاناعا جەتكىزىلدى
استانا. KAZINFORM - ەلوردانىڭ «Has Sanat» ونەر گالەرەياسىندا Lumiere-Hall مۋزەيى ۇيىمداستىرعان «سالۆادور دالي. قۇپيا جازۋ» كورمەسى اشىلدى. ەكسپوزيتسيادا سيۋررەاليستتىڭ 61 ءتۇپنۇسقا ليتوگرافياسى ۇسىنىلعان.
Lumiere-Hall مۋزەيىنىڭ نەگىزىن قالاۋشى پولينا ەگارميننىڭ ايتۋىنشا، بيىل سيۋررەاليزمگە، الەمدىك بەينەلەۋ ونەرىندەگى اۆانگاردتىق باعىتقا 100 جىل تولادى.
وعان قوسا، بيىل الەم سيۋررەاليزمنىڭ ەڭ كورنەكتى شەبەرلەرىنىڭ ءبىرى سالۆادور داليدىڭ تۋعانىنا 120 جىل تولادى.
«قازىر بۇكىل الەمدە كورمەلەر مەن جارمەڭكەلەر ءوتىپ جاتىر، جۋرنالداردا تۇتاس نومىرلەر وسى تاقىرىپقا ارنالىپ، كىتاپتار مەن البومدار شىعارىلۋدا. بۇگىندە ەۋروپانىڭ، ا ق ش-تىڭ، ازيانىڭ كەز كەلگەن ۇلكەن قالاسى سيۋررەاليزممەن ءومىر سۇرەدى. ءبىز قازاقستاننىڭ دا وسى الەمدىك سيۋررەاليزمدى تويلاۋ كارتاسىنا ەنگەنىن قالادىق»، - دەيدى پولينا ەگارمين.
كورمەدە جەكە كوللەكسيونەر جيناعان 61 ءتۇپنۇسقا گرافيكالىق تۋىندىلار جيناعى بار.
«بۇل توپتامانى ەلىمىزگە اكەلۋ ءۇشىن كوپ كۇش جۇمسادىق. تۋىندىلار ءتۇرلى مۋزەيگە كورمەگە بەرىلەدى جانە ءبىز ءوز كەزەگىمىزدى ءبىر جىل كۇتتىك. جەكە كوللەكسيونەر بۇل جۇمىستارى 10 جىل بويى جيناقتاعان. مۋزەيلەردەن، جەكە كوللەكسيونەرلەردەن، ءتىپتى ديۆاننىڭ ارتىنان كەزدەيسوق تابىلعان جۇمىستار بار»، - دەيدى سپيكەر.
ەكسپوزيتسيا قۇرامىنا «كارمەن»، «اليسانىڭ عاجايىپتار ەلىندە»، «دالينيان جىلقىلارى»، «ماحاببات تريلوگياسى» سەريالارىنىڭ ليتوگرافيالارى، سونداي-اق پەدرو دە الاركوننىڭ «ترەۋگولكا» پوۆەسىنە ارنالعان 20 يلليۋستراتسياسى ەنگەن.
مۋزەي باسشىسىنىڭ ايتۋىنشا، سالۆادور دالي ءوزىنىڭ كارتينالارىمەن عانا ەمەس، كوپتەگەن ونەرتانۋشىلار اتاپ وتكەن ەكستسەنتريستىك ەرسى قىلىقتارىمەن دە تانىمال بولدى.
«ول سۋرەتشى مە، الدە شوۋمەن بە - بۇل تۋرالى بارلىق ونەرتانۋشىلار، مادەني قايراتكەرلەر پىكىر تالاستىرىپ كەلەدى. دالي مەن پيكاسسو ومىردە وتە تانىمال جانە تابىستى بولدى. بارلىعى ولاردىڭ جۇمىسىن قالاعاندىقتان تۋىندىلار قولجەتىمدى بولۋى ءۇشىن باسپا گرافيكاسىنا كوشتى. بۇل ونەردى ەليتالىق ەمەس، قولجەتىمدى ەتۋگە تىرىسقان العاشقى سۋرەتشى جانە بۇل دا وتە ماڭىزدى»، - دەپ قورىتىندىلادى پ. ەگارمين.
س. دالي تۋىندىلارىنىڭ كورمەسى 29-قىركۇيەككە دەيىن جالعاسادى.
اۆتور
ايجان سەرىكجان قىزى
