سادىر جاپاروۆ: قىرعىزستاندا ۇنەمدەلگەن سۋدىڭ ءار ليترى - كورشىلەرىمىزگە كومەك

استانا. KAZINFORM - قىرعىزستان پرەزيدەنتى سادىر جاپاروۆ بىشكەكتە وتكەن Ⅲ حالىقتىق قۇرىلتايدا سويلەگەن سوزىندە حالىقتى سۋ رەسۋرستارىن ءتيىمدى پايدالانۋعا شاقىردى.

سادىر جاپاروۆ الەمدەگى ەكولوگيالىق جاعدايدىڭ ناشارلاۋىنا بايلانىستى سۋ تاپشىلىعىنىڭ جىل سايىن ارتىپ كەلە جاتقانىن ەسكە سالدى.

- ءبىز وزەندەردىڭ باستاۋىندا ورنالاسقان تاۋلى ەلمىز. بىزدەگى سۋ رەسۋرستارى ءبىزدى عانا ەمەس، كورشى ەلدەردى دە قامتاماسىز ەتەدى. بۇل رەتتە ۇنەمدەلگەن سۋدىڭ ءاربىر ليترى كورشىلەرىمىزگە كومەك. سۋدى ءتيىمدى پايدالانۋ - ءوزىمىزدىڭ عانا ەمەس، كورشىلەس ەلدەردە تۇراتىن حالىقتاردىڭ الدىنداعى جاۋاپكەرشىلىگىمىز، - دەدى قىرعىزستان پرەزيدەنتى.

ونىڭ ايتۋىنشا، حالىقتى سۋارمالى سۋمەن قاتار اۋىز سۋمەن قامتاماسىز ەتۋدى ۇنەمى نازاردا ۇستاۋدى جانە ناقتى قادامدى قاجەت ەتەدى.

- ءبىز بۇل ماسەلەنىڭ اۋىرلىعىن تۇسىنەمىز. سوڭعى جىلدارى ءبىز 400 مىڭنان استام ادامدى تازا اۋىز سۋمەن قامتاماسىز ەتسەك، 2025 -جىلى قوسىمشا 150 مىڭ ادامدى سۋمەن قامتاماسىز ەتۋدى جوسپارلاپ وتىرمىز. ەلىمىزدەگى ءاربىر وتباسى تازا سۋعا قول جەتكىزبەيىنشە، ءبىز توقتامايمىز، - دەدى ول.

ەكى كۇنگە سوزىلاتىن قۇرىلتايعا رەسپۋبليكانىڭ بارلىق وبلىستارىنان 698 دەلەگات، ونىڭ ىشىندە 30 ەتنوس وكىلدەرى، 30 شەتەلدەگى ەڭبەك ميگرانتتارى، سونداي- اق مينيسترلەر كابينەتى مۇشەلەرى، پارلامەنت دەپۋتاتتارى، مەملەكەتتىك ورگانداردىڭ وكىلدەرى قاتىستى.

ايتا كەتەيىك، II حالىق قۇرىلتايى 2023 -جىلدىڭ 15-16 -جەلتوقسانىندا بىشكەكتە وتكەن بولاتىن.

قىرعىزستاندا 2025 -جىلدان باستاپ تاڭبالانباعان جانارماي اينالىمىنا تىيىم سالىنادى.

ەركەجان سماعۇلوۆا

اۆتور