سۋ ىشكەن قۇدىعىڭا تۇكىرمە، ءىنىم - ءانشى جىگەر اۋىپبايەۆ «قويشى بالاعا» ەسكەرتۋ جاسادى
استانا. قازاقپارات - تيك توكتىڭ تىكەلەي ەفيرىندە قويشى بالا اتانعان ءانشى ايدوس قادەن بۇرىنعى پروديۋسسەرى جىگەر اۋىپبايەۆ جايلى ەكىۇشتى پىكىر ايتقان. ءانشىنىڭ كوڭىلىنە سول ءسوز ءتيىپ كەتكەن، دەپ حابارلايدى Ulysmedia.kz.

- ول (جىگەر اۋىپبايەۆ) مەنى اتىم شىعىپ، تانىلا باستاعان كەزدە الىپ كەتتى. اۋىلدا تانىلماي، قوي باعىپ جۇرگەندە الىپ كەتسە، وندا دۇرىس ەدى، - دەيدى سوزىندە قويشى بالا.
جىگەر اۋىپبايەۆ وسى ءسوزدى ەستىپ، كوڭىلى بۇزىلعانىن بىلدىرگەن.
- اۋىلدان الماتىعا الىپ كەلىپ قاناتىمنىڭ استىنا الىپ، قانشاما تالانتتى ءىنى-قارىنداستارىم ارمانداپ جۇرگەن ساحنالارعا جەتەكتەپ شىعارعانىمدى قايتەيىن. ەڭ وكىنىشتىسى، كوپشىلىك كورىپ كۋا بولىپ جۇرگەن كىشىگىرىم ەڭبەگىمدى ەلەمەگەنىڭ. سەنىڭ الار اسۋلارىڭ ءالى الدا ەدى، ايدوسجان. «قايتا كىرەر ەسىگىڭدى قاتتى جاپپا»، «سۋ ىشكەن قۇدىعىڭا تۇكىرمە» دەيدى قازاق. 3 جىل ۇيىمدە تۇرىپ، اسىمدى ءىشىپ كەلىپ، ەندى تيك توكتىڭ تىكەلەي ەفيرىندە كوپشىلىككە ايتىپ وتىرعان اڭگىمەڭدى ەستىپ، كورىپ مەن ۇيالىپ وتىرمىن، - دەپ جازدى جىگەر.
- اقىلىڭ بار عوي، بالاقاي. ارتىق اڭگىمەنى قويا عوي. بۇل ەسكەرتۋ دەپ قابىلداي عوي. مەن سەنى ءىنىم، شاكىرتىم رەتىندە جاقسى كورەمىن. سول قادىرىڭدى كەتىرمەي-اق قوي، - دەپ جازدى جىگەر اۋىپبايەۆ تيك توك جەلىسىندە.
ءانشى جىگەر اۋىپبايەۆ ءوزى ساحناعا شىعارعان «قويشى بالامەن» ارالاسپاي كەتكەنىن حابارلاعان ەدى. «بالا قازىر وتپەلى كەزەڭدە ءجۇر» دەيدى ول.
ايدوس قادەن جاقىندا جاڭا پروديۋسسەرىن تانىستىردى.