سۋ تاسقىنىنان زارداپ شەككەن تۇرعىنداردىڭ تەزىرەك قالىپتى ومىرگە ورالۋىن قامتاماسىز ەتۋىمىز كەرەك - ولجاس بەكتەنوۆ
استانا. KAZINFORM - اتىراۋ وبلىسىندا ەلدى مەكەندەردى سۋ باسىپ قالۋ قاۋپى ساقتالىپ وتىر. بۇل تۋرالى بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
«كورىپ وتىرعانىمىزداي، اتىراۋ وبلىسىندا ەلدى مەكەندەردى سۋ باسىپ قالۋ قاۋپى ساقتالىپ وتىر. سوندىقتان ءتيىستى قۇرىلىمدار تاسقىنعا قارسى جۇمىستاردى جالعاستىرۋى قاجەت. اسىرەسە، يندەربور جانە ماحامبەت ەلدى مەكەندەرىندەگى جاعدايدى ەرەكشە باقىلاۋعا الۋ كەرەك. وندا جايىق وزەنى قاۋىپتى دەڭگەيدەن اسىپ كەتتى. ەۆاكۋاتسيالىق بەكەتتەر كەز كەلگەن ۋاقىتتا ادامداردى قابىلداۋعا دايىن بولۋعا ءتيىس. كۇشتەر مەن قۇرالدار دا ساقاداي ساي تۇرۋى كەرەك. سۋ رەسۋرستارى مينيسترلىگى مەن اتىراۋ وبلىسىنىڭ اكىمدىگى جايىق وزەنىندەگى سۋ دەڭگەيىنە تۇراقتى مونيتورينگ جۇرگىزۋدى قامتاماسىز ەتسىن. سونىمەن قاتار اقتوبە وبلىسىندا 2 ەلدىمەكەندە ءالى كۇنگە دەيىن كولىك قاتىناسى جوق. وندا ازىق-تۇلىك پەن ءدارى-دارمەكتەردىڭ بولۋىن مۇقيات باقىلاۋعا الۋ كەرەك. ەلەكتر جارىعىنسىز وتىرعان اۋىلدار دا بار. جوندەۋ جۇمىستارىن تەزدەتۋ كەرەك»، - دەدى ۇكىمەت باسشىسى.
سونىمەن قاتار ول سۋ تاسقىنى جاعدايى تۇراقتالعان وڭىرلەردە اكىمدىكتەر باعالاۋ جانە جوبالاۋ جۇمىستارىن كۇشەيتۋى تيىستىگىن باسا ايتتى.
«كەلتىرىلگەن زالالدى وتەۋ، ونىڭ ىشىندە ۇيلەر مەن ينفراقۇرىلىمدى قالپىنا كەلتىرۋ جونىندەگى بارلىق شارالار بەلگىلەنگەن مەرزىمدە ىسكە اسىرىلۋى قاجەت. ءبىز زارداپ شەككەن تۇرعىنداردىڭ مۇمكىندىگىنشە تەزىرەك قالىپتى ومىرگە قايتا ورالۋىن قامتاماسىز ەتۋىمىز كەرەك»، - دەدى ولجاس بەكتەنوۆ.
اۆتور
مارلان جيەمباي
