سۋ تاسقىنى كەزىندە قاپ تاسىعان پشون اتتى ءيتتىڭ ەسكەرتكىشى قايدا قويىلادى

اتىراۋ. KAZINFORM - اتىراۋ وبلىسىندا بىلتىرعى سۋ تاسقىنى كەزىندە پشون اتالاتىن ءيت قاپ تاسىعان ەدى. ونى قاراشا ايىندا اتىپ كەتتى.

Пшон атты итке жасалған ескерткіш
Фото: Азамат Кенжеғалиев

ءيتتى اسىراعان وتباسى ماحامبەت اۋدانىنىڭ سارىتوعاي اۋىلىندا تۇرادى. ءيتتىڭ يەسى زامزاگۇل جاڭابايەۆانىڭ ايتۋىنشا، پشوندى كۇشىك كەزىنەن اسىراعان. ءبىراق ول قاباعان ءيت ەمەس.

ال يندەر اۋدانىندا تۇراتىن شەبەر ازامات كەنجەعاليەۆ ءوزىنىڭ شەبەرحاناسىندا جۇرتشىلىقتىڭ وڭ پىكىرىنە ارقاۋ بولعان پشوندى كەزەكتى ارحيتەكتۋرالىق تۋىندىسىنا ارقاۋ ەتتى. ونى جۇرەك تەكتەس تەمىر بولشەكتەرىنەن قۇراستىرعان.

قازىر دايىن تۋىندى ارت-شەبەردىڭ شەبەرحاناسىندا تۇر.

اتىراۋ وبلىسى اكىمىنىڭ باسپا ءسوز حاتشىسى رۋسلان جۇماعازيەۆتىڭ پىكىرىنشە، ازىرگە ارحيتەكتۋرالىق تۋىندىنىڭ قايدا قويىلاتىنى بەلگىسىز.

- اتالعان ارحيتەكتۋرالىق تۋىندىنى جاساعان شەبەر اكىمدىككە حابارلاستى. وعان تۋىندىنى ماحامبەت اۋدانىنىڭ ورتالىعىنا قويۋ تۋرالى ۇسىنىس بەرىلدى. الايدا تۋىندى اۆتورى بۇل ۇسىنىسپەن كەلىسپەي وتىر. ول تۋىندىسىن اتىراۋ قالاسىندا ورناتۋدى ۇسىندى. ونى وبلىس ورتالىعىنا قويۋدىڭ مۇمكىندىگى جوق. وسىلايشا، ازىرگە قاشان، قايدا قويىلاتىنى جونىندە ناقتى شەشىم قابىلدانبادى، - دەپ ءمالىم ەتتى رۋسلان جۇماعازيەۆ.

ەسكە سالا كەتەيىك، اتىراۋ وبلىسىندا كوكتەمگى سۋ تاسقىنى كەزىندە قاپ تاسىعان ءيت تۇسىرىلگەن بەينەجازبا تاراعان ەدى. 27-قاراشادا سول ءيتتى اتىپ كەتكەن.

كەيىن جەرگىلىكتى شەبەردىڭ پشون ەسكەرتكىشىن جاساۋعا كىرىسكەنىن جازعان بولاتىنبىز.

اۆتور

جولداسبەك شوپەعۇل

سوڭعى جاڭالىقتار