س. سەيفۋلليننىڭ «سارى ارقا»، «اۋپىلدەك» كۇيلەرى تابىلدى

استانا. قازاقپارات- ساكەن سەيفۋلليننىڭ «سارى ارقا» كۇيى اباقتىدا وتىرعان اقىننىڭ ەلگە دەگەن ساعىنىشىنان تۋعان. مۇنى مۋزەي ديرەكتورى مارات ابسەمەت ايتتى.

كۇيدى ورىنداعان ايگىلى قوبىزشى داۋلەت مىقتىباي ۇلى. ول كۇيدى 1964 -جىلى قازاق راديوسىنىڭ التىن قورىنا تاپسىرعان.

مارات ابسەمەت، تاريح عىلىمدارىنىڭ دوكتورى:

- بۇل كىسىنىڭ قىلقوبىزبەن تارتقان ەكى كۇيى تابىلدى. ماسەلەن، «سارى ارقا»، «اۋپىلدەك» دەگەن ەكى كۇيى التىن قوردا تۇر. الماتىدا. سونى مەن ءتۇسىرىپ كەلدىم. 24-تامىز كۇنى 1964 -جىلى اتاقتى قوبىزشى داۋلەت مىقتىباي ۇلى قازاق راديوسىنا بارىپ ورىنداپ بەرگەن. ارحيۆكە جازىپ كەتكەن ەكى كۇي دەپ. ول قۇجات تۇر.

ساكەننەن قالعان ەكىنشى كۇي - «اۋپىلدەك». بۇل كۇي ساكەن سەرىنىڭ سەرگەلدەڭگە تۇسكەن ۋاقىتىندا جازىلعان. الايدا وسى كۇيلەردىڭ بۇگىنگى كۇنگە دەيىن جاريالانباۋىنىڭ سەبەبىن تاريح عىلىمدارىنىڭ دوكتورى مارات ابسەمەت كەڭەس ۇكىمەتىنىڭ ساياساتىمەن بايلانىستىردى. بۇل كۇيدىڭ ساكەندىكى ەكەنىن، اقىننىڭ ءىنىسى ءماجيتتىڭ قىزى سوفيا سەيفۋللينا دا راستايدى.

سوفيا سەيفۋللينا، س. سەيفۋلليننىڭ تۋىسى:

- ساكەننىڭ اكەسى دە كۇي جازعان. ساكەننىڭ ءوزى دە كۇي جازعان. ول قوبىز تۇرماق پيانينودا ويناعان. ول نەشە ءتۇرلى ونەرگە قۇمار بولعان ادام. وعان كۇمان كەلتىرۋگە بولمايدى. ساكەننىڭ ءالى دە كوپ دۇنيەسى اشىلماعان.

سوڭىنا وشپەس مۇرا قالدىرعان الاشتىڭ ايبوز ۇلى ساكەن سەيفۋللين 1937-جىلى حالىق جاۋى رەتىندە تۇتقىندالىپ، اباقتىعا قامالدى. 1938-جىلى الماتى ماڭىندا اتىلدى دەگەن دەرەك بار. ءبىراق ودان كەيىن ماگاداندا كوردىك، سوندا جەرلەندى دەگەندەر دە بولعان. وكىنىشتىسى ارتىنان سول ماگادانعا تالاي جوقشى ىزدەپ بارعانمەن، مۇز توڭ بولىپ ءوسىپ كەتكەندىكتەن ەسىل ەردىڭ سۇيەگىن تابا المادى. ونىڭ ىزىنەن ەرگەن ايانى دا ساكەننىڭ ارتىنان ىزدەپ بارعان ايەلى گۇلباھرامنىڭ قولىندا، سۋىق ءتيىپ كوكشە جەرىندە قايتىس بولعان. ءسويتىپ ارتىندا ۇرپاق تا قالمادى.