س ق و ستۋدەنتتەرى سۋ تاسقىنىمەن كۇرەسىپ جاتقاندارعا 100 كەلىگە جۋىق باۋىرساق-سامسا ءپىسىردى

پەتروپاۆل. KAZINFORM - سولتۇستىك قازاقستان وبلىسىنداعى جوعارى وقۋ ورنى ستۋدەنتتەرى سۋ تاسقىنىمەن كۇرەسكە ات سالىسىپ، ءبىرى ۆولونتەر بولسا، ەندى ءبىرى ۇستازدارىمەن قۇتقارۋشىلارعا نان ونىمدەرىن ءپىسىرىپ، تاماقتاندىرىپ ءجۇر.

م. قوزىبايەۆ اتىنداعى سولتۇستىك قازاقستان ۋنيۆەرسيتەتى باسپا ءسوز قىزمەتىنىڭ مالىمەتىنشە، ستۋدەنتتەر بۇگىندە قاشىقتان ءبىلىم الىپ جاتىر. وقىتۋشىلار، قىزمەتكەرلەر مەن ستۋدەنتتەر سۋ تاسقىنىمەن كۇرەسكە ءبىر كىسىدەي ات سالىسۋدا. ۆولونتەرلەر گۋمانيتارلىق كومەك تاسىپ، ەۆاكۋاتسيالىق پۋنكتتەرگە سۋ، ازىق-تۇلىك، كيىم-كەشەك جانە باسقا دا قاجەتتى زاتتاردى جەتكىزىپ ءجۇر.

ال ۇجىمنىڭ ايەلدەر قاۋىمى 9-15-ءساۋىر ارالىعىندا اگروتەحنولوگيالىق فاكۋلتەتتىڭ ازىق-تۇلىك قاۋىپسىزدىگى زەرتحاناسىندا سۋ تاسقىنىمەن كۇرەسىپ جاتقان ۆولونتەرلەر مەن اسكەري قىزمەتشىلەرگە تاماق دايىنداۋمەن اينالىستى. بارلىعى 40 قا جۋىق ادام 80 كەلى باۋىرساق، 9 كەلىدەن استام سامسا، 5 كەلى توقاش پىسىرگەن.

سونداي-اق جوعارى وقۋ ورنىندا سۋ تاسقىنىنان زارداپ شەككەندەرگە كومەك جيناۋ پۋنكتى جۇمىس ىستەيدى. ول № 4 كورپۋستىڭ 101 كابينەتىندە ورنالاسقان.

بۇعان دەيىن پرەزيدەنت قاسىم-جومارت توقايەۆ سولتۇستىك قازاقستان وبلىسىنا جۇمىس ساپارىمەن بارعانىن ايتقان ەدىك. مەملەكەت باسشىسى سەرگەيەۆكا سۋ قويماسىن، سۋ باسقان قىزىلجار اۋدانىن جانە پەتروپاۆل قالاسىنىڭ توڭىرەگىن تىكۇشاقپەن ارالاپ كوردى.

كەيىن تاسقىن سۋ سالدارىنان ەۆاكۋاتسيالانعان اۋدانداردىڭ حالقىمەن كەزدەستى.

اۆتور

اقەركە داۋرەنبەك قىزى