س ق و-دا سۋ تاسىعان اۋماقتا بالىق اۋلاعان 12 ادام جاۋاپقا تارتىلدى
پەتروپاۆل. KAZINFORM - سولتۇستىك قازاقستان وبلىسىندا تابيعاتتى قورعاۋ پوليتسياسىنىڭ قىزمەتكەرلەرى مەن وبلىسارالىق ەسىل باسسەيندىك ينسپەكتسياسىنىڭ ينسپەكتورلارى بىرلەسكەن رەيد وتكىزىپ جاتىر. ويتكەنى ءساۋىردىڭ 15 نەن ماۋسىمنىڭ 1 ى ارالىعىندا ۋىلدىرىق شاشۋعا بايلانىستى بالىق اۋلاۋعا تىيىم سالىنعان.
تاسىعان سۋ بالىقتى وڭاي ولجاعا اينالدىردى. بۇل كەي ادامداردى قىزىقتىرماي قويماسى انىق. سقو پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ايىرتاۋ اۋدانى تابيعاتتى قورعاۋ پوليتسياسىنىڭ قىزمەتكەرلەرى مەن وبلىسارالىق ەسىل باسسەيندىك ينسپەكتسياسىنىڭ ينسپەكتورلارىمەن رەيد جۇرگىزىپ، بالىق اۋلاۋدىڭ قىزىعىنا تۇسكەن 12 جەرگىلىكتى تۇرعىندى انىقتادى. تالاپتى بۇزعاندار اكىمشىلىك جاۋاپكەرشىلىككە تارتىلدى.
«وسىنداي رەيدتىك ءىس-شارالار باسقا اۋدانداردا دا جۇرگىزىپ جاتىر. ۋىلدىرىق شاشۋ كەزەڭىندە بالىق اۋلاۋ دا تابيعي رەسۋرستاردى قالپىنا كەلتىرۋگە زيان كەلتىرەتىنىن ەستە ساقتاۋىڭىزدى سۇرايمىز»، - دەيدى س ق و پ د جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى الەكساندر روزباح.
تابيعاتتى قورعاۋ پوليتسەيلەرى اڭشىلارعا 27-ساۋىردەن 11-مامىرعا دەيىن وبلىس اۋماعىندا قازاقستان رەسپۋبليكاسىنىڭ قىزىل كىتابىنا ەنگەن تۇرلەردەن باسقا، جابايى ۇيرەكتەردىڭ اتالىقتارىنا كوكتەمگى اڭ اۋلاۋ ماۋسىمى اشىلاتىنىن ەسكە سالادى.
اڭ اۋلاۋ ءۇشىن ىلەسپە قۇجاتتاردىڭ بولۋى شارت. رەزەرۆتىك قوردىڭ اڭشىلىق القاپتارىندا، قازداردىڭ بارلىق تۇرلەرىنە، سونداي- اق انالىق جابايى ۇيرەكتەر مەن انالىق قۇردى اتۋعا تىيىم سالىنادى.
اۆتور
اقەركە داۋرەنبەك قىزى
