س ق و-دا اكىمدىك جالعىزىلىكتى اناعا كۇردەلى جوندەۋدى قاجەت ەتەتىن باسپانا بەرگەن
پەتروپاۆل. KAZINFORM - سولتۇستىك قازاقستان وبلىسى تيميريازيەۆ ەلدى مەكەنىنىڭ تۇرعىنى جەرگىلىكتى اكىمدىكتىڭ كوممۋنالدىق تۇرعىن ءۇي قورىنان بەرگەن باسپاناسىنا كوڭىلى تولمايدى. جالعىزىلىكتى انانىڭ ايتۋىنشا، ول پاتەردە تۇرۋ مۇمكىن ەمەس.
ۆيولەتتا ەسىمدى كەلىنشەك باعدارلاما بويىنشا العان پاتەرىنىڭ فوتولارىن الەۋمەتتىك جەلىدە جاريالادى. باسپاناعا كۇردەلى جوندەۋ قاجەت. تەرەزەسى مەن قابىرعالارى عانا بار. قالعانىن ءبارىن اۋىستىرۋ كەرەك.
«ىلعالدان پاتەردىڭ ەدەنى ءشىرىپ كەتكەن. قابىرعالارىن كوك باسقان. قازىر قىس ۋاقىتىندا بۇل ۇيدە تۇرۋ مۇمكىن ەمەس. جىلىتۋ جۇيەسى دۇرىس ىستەمەيدى، ەلەكتر جىلىتقىشتاردى كۇنى-ءتۇنى جاعۋ كەرەك، سالدارىنان ەلەكتر قۋاتى ءۇشىن ۇلكەن تولەم شىعادى. اۋداندىق تۇرعىن ءۇي-كوممۋنالدىق شارۋاشىلىق بولىمىنەن كومەك سۇراپ اپتا سايىن باردىم، الايدا ولار شارا قولدانار ەمەس»، - دەيدى جالعىزىلىكتى انا.
تيميريازيەۆ اۋداندىق ساۋلەت، قۇرىلىس، تۇرعىن ءۇي-كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمى وسى ماسەلەگە قاتىستى جاۋاپ بەردى.
«پاتەردە ەدەن جابىنىن اۋىستىرۋ بويىنشا اعىمداعى جوندەۋ جۇرگىزىلدى. كوممۋنالدىق تۇرعىن ءۇي قورىنان پاتەر الۋعا كەزەكتە تۇرعاندارعا تاڭداۋ ءۇشىن قولدا بار باسپانالار الدىن الا كورسەتىلەدى، كەزەكتە تۇرعانداردىڭ كەلىسىمىنەن كەيىن تۇرعىن ءۇي بەرىلەدى. وسى پاتەردى بەرۋ كەزىندە سىزگە پاتەردە اعىمداعى جوندەۋ جۇمىسىن ءوزىڭىز جۇرگىزەتىندىگىڭىز ايتىلىپ، كەلىسىلدى. تۇرعىن ءۇي-كوممۋنالدىق شارۋاشىلىعى بولىمىنە جۇگىنگەنىڭىزدە سىزگە تاڭداۋ ءۇشىن قول جەتىمدى نۇسقالار كورسەتىلدى. ءسىز بۇل پاتەردى ءوزىڭىز تاڭدادىڭىز. سونداي-اق، ءسىز جاريالاعان فوتوسۋرەتتەر ەدەندى بولشەكتەۋ جۇمىستارى باستالعان كەزدە تۇسىرىلگەن»، - دەلىنگەن جاۋاپتا.
اۆتور
اقەركە داۋرەنبەك قىزى
