سۋ كىرگەن باسپانامىزدىڭ قابىرعاسى ۇگىتىلىپ، قۇلاپ جاتىر - س ق و تۇرعىنى
پەتروپاۆل. KAZINFORM - سولتۇستىك قازاقستان وبلىسىندا تاسقىننىڭ بەتى قايتىپ، قاۋىپتى اۋماقتان كوشىرىلگەندەردىڭ الدى باسپانالارىنا كىرە باستادى. سۋدا بىرنەشە كۇن تۇرىپ قالعان ۇيلەردىڭ جاعدايى ءماز ەمەس، قازىرگى ۋاقىتتا تەحنيكالىق زەرتتەۋ جۇرگىزىلىپ، كەلگەن شىعىن ەسەپتەلىپ جاتىر.
عابيت مۇسىرەپوۆ اتىنداعى اۋداندا 9 تۇرعىن ءۇي سۋعا كەتتى. ونىڭ بىرەۋى درۋجبا ەلدى مەكەنىندە، قالعانى اۋدان ورتالىعى نوۆويشيمسكوە اۋىلىندا.
تاسقىننان زارداپ شەككەندەردىڭ ءبىرى - گۇلجاز قۇلمانوۆا. ەلدى مەكەن تۇرعىنى اۋداندىق مادەنيەت ۇيىندە كوركەمدىك جەتەكشى، كۇيەۋى جانبولات باتىربايەۆ وسى مەكەمەدە ادىسكەر بولىپ جۇمىس ىستەيدى. نوۆويشيمسكوە ەلدى مەكەنىنە 2002 -جىلى وزبەكستاننىڭ ناۆوي وبلىسى، تامدىبۇلاق اۋدانىنان كوشىپ كەلگەن ەكەن.
«ەكى ۇلىم بار، ەكەۋى دە ستۋدەنت. بۇل ۇيدە ەلگە قونىس اۋدارعاننان بەرى تۇردىق. 1960-جىلى ساماننان سالىنعان ءۇش بولمەلى ءۇي. 2017 -جىلى وڭىردە قاتتى سۋ تاسقىنى بولعاندا دا سۋ ۇيگە دەيىن كەلگەنىمەن، كىرمەپ ەدى.
سۋ باساتىنىن، زاتتارىڭىزدى جيناڭىز دەپ الدىن الا ايتتى. اۋىلدىق اكىمدىكتىڭ قىز- جىگىتتەرى كەلدى، توتەنشە جاعدايلار ءبولىمىنىڭ ماماندارى ەسكەرتتى. ءۇيدىڭ ىرگەتاسى بيىك، سول سەبەپتى ۇيگە كىرەدى دەپ ويلاعان جوقپىز. سوندىقتان دۇنيە- مۇلىكتىڭ جارتىسى قالدى، تۇرمىستىق تەحنيكا سۋعا كەتتى. الىپ شىققانىمىز - كرەسلو- ديۆان، كىشكەنە كورپە-جاستىق جانە كيىم-كەشەك، قالعانى ءبارى قالدى. مالىمىز جوق»، - دەيدى گۇلجاز قۇلمانوۆا.
تاسقىن سۋ اۋىلعا 6 -ءساۋىر تۇندە كەلىپ، بىرەر ساعاتتا بيىكتىگى 1,5 مەترگە جەتكەن.
«ءۇيدىڭ، تەرەزەنىڭ جارتىسىنا دەيىن سۋ كوتەرىلدى. سۋ ەكى-ءۇش كۇن تۇردى. قازىر ءۇيدىڭ ىشىندەگىسى كەتتى، تەك جەرتولەدە سۋ تۇر. قابىرعالارى ۇگىتىلىپ قۇلاپ جاتىر. جوندەۋ ءۇشىن قانشاما قاراجات كەرەك. ءارى ول ۇيدە تۇرساق اۋرۋ بولامىز. ماسەلە شەشىلەدى دەپ ويلايمىن، جەرگىلىكتى اكىمدىك ءۇي الىپ بەرەمىز دەپ وتىر. كورشىلەرىمدەگى جاعداي دا ءماز ەمەس»، - دەيدى اۋىل تۇرعىنى.
قازىر گۇلجاز قۇلمانوۆا بالا-شاعاسىمەن قايىن ءىنىسىنىڭ ۇيىندە ءۇش وتباسى بولىپ تۇرىپ جاتىر. تيەسىلى ءبىر جولعا كومەك - 100 ا ە ك مولشەرىندە جاردەماقى العان. ءومىرى تەزىرەك قالىپتى جاعدايعا كەلسە ەكەن دەگەن تىلەگى بار.
ع. مۇسىرەپوۆ اتىنداعى اۋدان اكىمدىگىنىڭ مالىمەتىنشە، تاسقىننان نوۆويشيمسكوە ەلدى مەكەنىندە 25 ادام زارداپ شەكتى. ال درۋجبا اۋىلىندا ءۇيى سۋدا قالعان ەكى تۇرعىنعا جەرگىلىكتى «سەليننوە-2004» ج ش س بىردەن باسقا باسپانا بەرگەن. سونداي-اق مالدارىن قاجەتتى جەم-شوپپەن قامتىدى.
11 -ءساۋىر اۋداندا تابيعي سيپاتتاعى توتەنشە جاعدايدا زارداپ شەككەندەرگە كەلتىرىلگەن ماتەريالدىق شىعىننىڭ مولشەرىن باعالايتىن كوميسسيا قۇرىلدى. قازىرگى ۋاقىتتا سۋدا قالعان ۇيلەرگە، دۇنيە- مۇلىككە تەحنيكالىق زەرتتەۋ جۇرگىزىلىپ جاتىر.
سونداي-اق اۋىلدىق وكرۋگتەردە سەنبىلىكتەر ۇيىمداستىرىپ، سۋ تاسقىنى اكەلگەن قوقىستى جيناپ، جويۋ جوسپارلانعان.
اۆتور
اقەركە داۋرەنبەك قىزى
