سۋ باسقان اۋماقتاردا جۇقپالى اۋرۋ جۇقتىرماۋ ءۇشىن نە ىستەۋ كەرەك

ورال. KAZINFORM - باتىس قازاقستان وبلىسىندا سۋعا كەتكەن اۋماقتاردا جۇقپالى اۋرۋلاردىڭ تارالۋى مۇمكىن بە؟ مىنە، وسىعان وراي ب ق و سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستايەۆ Kazinform تىلشىسىنە وڭىردەگى قازىرگى احۋال، جۇقپالى اۋرۋلاردىڭ الدىن الۋ جولدارى جونىندە اڭگىمەلەپ بەردى.

- نۇرلىبەك ەرمەك ۇلى، باتىس قازاقستان وبلىسىندا بىرنەشە اۋداندا ەلدى مەكەندەردى سۋ باسقانى بەلگىلى. ورال قالاسىندا دا قاۋىپ سەيىلگەن جوق. وسى رەتتە جۇقپالى دەرتتەردىڭ الدىن الۋ ءۇشىن نە ىستەۋ كەرەك، الدىمەن سوعان توقتالساڭىز؟

- قازىرگى تاڭدا سۋ باسقان ەلدى مەكەندەردەگى سانيتارلىق- ەپيدەميولوگيالىق احۋالعا كۇندەلىكتى مونيتورينگ جۇرگىزىلىپ، باقىلاۋدا ۇستالۋدا. سونىڭ ىشىندە توپتىق ىشەك اۋرۋلارىن بولدىرماۋ ەرەكشە ماڭىزدى. بۇل ءۇشىن تۇرعىندار جەكە گيگيەنا ەرەجەلەرىن ساقتاۋى كەرەك. اتاپ ايتقاندا، قولدى سابىنمەن مۇقيات جۋۋ قاجەت. اسىرەسە، اجەتحاناعا بارعاننان كەيىن نەمەسە جەكە ۋچاسكەدە جۇمىس ىستەپ، تاماقتانار الدىندا ۇمىتپاعان ءجون. تەك قايناتىلعان نەمەسە بوتەلكەدەگى سۋدى ءىشىپ، ازىق- تۇلىكتى ساقتاۋ جانە دايىنداۋ ەرەجەلەرىن ساقتاپ، تەرميالىق وڭدەلگەن تاعامدى جەۋ ماڭىزدى. سول سەكىلدى كوكونىس پەن جەمىستى مۇقيات جۋىپ، قايناعان سۋمەن وڭدەۋ ارتىق بولمايدى. تاسقىن سۋعا مالىنعان تاماق ونىمدەرىن پايدالانباعان دۇرىس. جۇمىس ىستەگەن كەزدە نەمەسە تۇرعىن ۇيلەر مەن اۋلا اۋماقتارىن تازالاعان ۋاقىتتا قولعاپ كيىپ، لاس قولمەن تاماق ىشپەۋ كەرەك.

تاعى ءبىر تارالاتىن اۋرۋدىڭ ءبىرى - ا ۆيرۋستىق گەپاتيتى. بۇل دەرتتى دە ادام ىشەك جۇقپالارى سياقتى جەكە باس گيگيەنالارىن ساقتاماعان كەزدە جۇقتىرۋى مۇمكىن. سوندىقتان ونىڭ الدىن الۋ ءۇشىن وسىنىڭ الدىندا ايتىلعان تالاپتاردى ساقتاعان ابزال.

ەگەر دەنە قىزۋىنىڭ كوتەرىلۋى، قۇسۋ، ءىش ءوتۋ سەكىلدى جەدەل جۇقپالى اۋرۋدىڭ بەلگىلەرى پايدا بولعان جاعدايدا وندا دەرەۋ جەرگىلىكتى مەديتسينالىق ۇيىمداردىڭ كومەگىنە جۇگىنۋ قاجەت.

جالپى، جۇقپالى جانە پارازيتتىك اۋرۋلاردىڭ الدىن الۋ ماقساتىندا دەپارتامەنت جانە اۋماقتىق سانيتارلىق- ەپيدەميولوگيالىق باقىلاۋ باسقارمالارىنىڭ ماماندارى ۋاقىتشا ورنالاستىرۋ پۋنكتتەرىندە تۇرعىندار اراسىندا سانيتارلىق- اعارتۋ جۇمىستارىن ۇدايى جۇرگىزۋدە.

- تاسقىن كەزىندە وبلىس كولەمىندە مال مولالارى مەن ءسىبىر جاراسى كومىندىلەرى سۋ استىندا قالدى. بۇعان بايلانىستى نە ايتار ەدىڭىز؟

- ءيا، مال مولالارى مەن ءسىبىر جاراسى كومىندىلەرىن باستى نازاردا ۇستاماسا بولمايدى. قازىرگى كەزدە ول جەرلەردەن سۋ كەتىپ جاتىر. اۋدانداردا جەرگىلىكتى سانيتاريالىق- ەپيدەميولوگيالىق باقىلاۋ باسقارمالارىنىڭ ماماندارى ورال وباعا قارسى كۇرەس ستانساسى قىزمەتكەرلەرىمەن، ۆەتەرينارلارمەن بىرلەسىپ، سول اۋماقتاردان سىنمالار الىپ، زەرتتەۋ جۇمىستارىن جۇرگىزۋدە.

قورىتا ايتقاندا، اسا قاۋىپتى جۇقپالى اۋرۋلار باقىلاۋدا بولا بەرمەك.

- اڭگىمەڭىزگە راحمەت.

ەسكە سالا كەتەيىك، بۇدان بۇرىن ۆەتەرينارلار ب قو - دا تاسقىن كەزىندە كومىندىلەردەن قاۋىپ جوق ەكەندىگى تۋرالى ايتقانىن جازعان بولاتىنبىز.

اۆتور