پرەزيدەنت ورتا ءبىلىم بەرۋ جۇيەسىنە جاساندى ينتەللەكتىنى ەنگىزۋ تۋرالى جارلىققا قول قويدى

قازاقستان رەسپۋبليكاسىندا جاساندى ينتەللەكتىنىڭ قارقىندى دامۋى جاعدايىندا جانە ادامي كاپيتالدىڭ نەگىزگى ەلەمەنتى رەتىندە زاماناۋي، يننوۆاتسيالىق ءبىلىم بەرۋ جۇيەسىن قالىپتاستىرۋدىڭ شۇعىل قاجەتتىلىگىن نەگىزگە الا وتىرىپ، قاۋلى ەتەمىن:

1. قازاقستان رەسپۋبليكاسىنىڭ ۇكىمەتى:

1) 2026 -جىلعى 1-شىلدەگە دەيىن ورتا ءبىلىم بەرۋ جۇيەسىندە جاساندى ينتەللەكتىنى كەڭىنەن ەنگىزۋگە باعىتتالعان، دەربەس وقىتۋ تەتىگىن، تسيفرلىق ينفراقۇرىلىمدى، پەداگوگ كادرلار دايارلاۋدى، ءبىلىم الۋشىلاردىڭ دەربەس دەرەكتەرىن قورعاۋدى كوزدەيتىن ورتا ءبىلىم بەرۋ جۇيەسىنە جاساندى ينتەللەكتىنى ەنگىزۋدىڭ 2026-2029-جىلدارعا ارنالعان كەشەندى ءىس-شارالار جوسپارىن (بۇدان ءارى - كەشەندى جوسپار) بەكىتسىن؛

2) قالالىق جانە اۋىلدىق مەكتەپتەر اراسىندا ءبىلىم بەرۋ ساپاسىنداعى الشاقتىقتى قىسقارتۋ ماقساتىندا جاساندى ينتەللەكتىنى دامىتۋ جونىندەگى كەڭەستىڭ مۇشەسى لي كاي- ءفۋدىڭ ۇسىنىمدارىن 2026-جىلعى 1-ماۋسىمعا دەيىن ءىس جۇزىندە قولدانىپ، ورتا ءبىلىم بەرۋ سالاسىنداعى پيلوتتىق جوبانى ىسكە اسىرۋ، ودان ءارى كەڭىنەن قولدانۋ جونىندە ناقتى ۇسىنىستار ەنگىزسىن؛

3) 2026-جىلعى 1-تامىزعا دەيىن پيلوتتىق جوبانى ىسكە اسىرۋ شەڭبەرىندە تۇراقتى، جىلدامدىعى جوعارى ينتەرنەتتىڭ بولۋىن قوسا العاندا، مەكتەپتەردىڭ تەحنيكالىق جاراقتاندىرىلۋىن قامتاماسىز ەتسىن؛

4) 2026-جىلعى 1-قىركۇيەككە دەيىن ءبىلىم بەرۋ كونتەنتىن گەنەراتسيالاۋدى جانە وقۋ ناتيجەلەرىن باعالاۋدى، سونداي-اق ءبىلىم بەرۋ مەكەمەلەرىندە جاساندى ينتەللەكت قۇرالدارىن پايدالانۋدى رەتتەۋ ماقساتىندا اكادەميالىق ادالدىققا كەپىلدىكتەر بەرۋدى قوسا العاندا، ورتا ءبىلىم بەرۋ جۇيەسىندە جاساندى ينتەللەكتىنى قولدانۋ ستاندارتتارىن بەكىتسىن؛

5) 2026-جىلعى 1-قىركۇيەككە دەيىن پەداگوگتەردىڭ ۇزدىكسىز كاسىپتىك دامۋىن كوزدەيتىن جانە جاساندى ينتەللەكت تەحنولوگيالارىن پەداگوگتەردىڭ كاسىپتىك قىزمەتىنە نۇقسان كەلتىرمەي جانە ونى الماستىرماي ءبىلىم بەرۋ پروتسەسىندە قوسىمشا ءتيىمدى قۇرال رەتىندە پايدالانۋدى قامتاماسىز ەتەتىن شارالار جوسپارىن بەكىتسىن؛

6) ورتا ءبىلىم بەرۋ ۇيىمدارىنداعى دەربەس دەرەكتەردى قورعاۋدى كۇشەيتۋ جانە ءبىلىم بەرۋ كونتەنتىنىڭ قازاقستان رەسپۋبليكاسىنىڭ مەملەكەتتىك جالپىعا مىندەتتى ءبىلىم بەرۋ ستاندارتىنىڭ تالاپتارىنا سايكەستىگىن قامتاماسىز ەتۋ جونىندە شارالار قابىلداسىن.

2. استانا، الماتى، شىمكەنت قالالارىنىڭ جانە وبلىستاردىڭ اكىمدىكتەرى:

1) 2026-جىلعى 1-تامىزعا دەيىن كەشەندى جوسپارمەن ۇيلەستىرىلگەن، ورتا ءبىلىم بەرۋ جۇيەسىنە جاساندى ينتەللەكتىنى ەندىرۋ جونىندەگى وڭىرلىك جوسپارلاردى بەكىتسىن؛

2) پيلوتتىق جوبانى جانە كەشەندى جوسپاردى ىسكە اسىرۋ ماقساتىندا ۇيىمداستىرۋشىلىق جانە وزگە دە ءىس-شارالاردى قابىلداسىن.

3. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

4. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.