پرەزيدەنت تەلەراديوكەشەنىنىڭ دەلەگاتسياسى بەيجىڭدەگى 7- دۇنيەجۇزىلىك مەدياسامميتكە قاتىسۋدا
استانا. قازاقپارات - قازاقستان پرەزيدەنت تەلەراديوكەشەنىنىڭ دەلەگاتسياسى 5-9 -قاراشا ارالىعىندا بەيجىڭدە ءوتىپ جاتقان 7- دۇنيەجۇزىلىك مەدياسامميتكە قاتىسىپ جاتىر.
«شينحۋا» اقپاراتتىق اگەنتتىگىنىڭ 95 جىلدىق مەرەيتويىمەن ۇشتاستىرىلعان فورۋم «ينتەللەكتۋالدى ترانسفورماتسيا جاعدايىنداعى ب ا ق ميسسياسى جانە بىرلەسكەن ءىس-قيمىلدار» تاقىرىبىندا وتۋدە.
مەدياسامميت جۇمىسىنا الەمنىڭ 112 ەلىنەن 330-عا جۋىق ب ا ق، تالداۋ ورتالىقتارى مەن حالىقارالىق ۇيىمداردىڭ 500-گە جۋىق وكىلى قاتىسۋدا.
پرەزيدەنت ت ر ك- نىڭ مەرەيتويلىق ءىس-شاراعا قاتىسۋى «شينحۋا» اگەنتتىگىمەن بەيىندى باعىتتار بويىنشا كاسىبي سەرىكتەستىكتى جالعاستىرادى: بۇعان تاجىريبە جانە كونتەنت الماسۋدان باستاپ، ماڭىزدى جاڭالىقتار مەن وقيعالاردى ءوزارا جاريالاۋ، بىرلەسكەن شىعارماشىلىق جوبالاردى جۇزەگە اسىرۋ كىرەدى.
2025 -جىلدىڭ ماۋسىم ايىندا پرەزيدەنت ت ر ك- نىڭ قولداۋىمەن «شينحۋا» ۇيىمداستىرعان «قىتاي - ورتالىق ازيا» اقپاراتتىق اگەنتتىكتەر فورۋمى اياسىندا مەدياقۇرىلىمدار اراسىندا ىنتىماقتاستىق تۋرالى مەموراندۋمعا قول قويىلعان بولاتىن. قۇجاتتا مۋلتيمەديالىق ءوزارا ءىس- قيمىلدىڭ جاڭا فورماتتارىن دامىتۋ، اقپاراتتى ۇلتتىق جانە حالىقارالىق دەڭگەيدە ىلگەرىلەتۋ كوزدەلگەن.
ەسكە سالا كەتەيىك، سول ۋاقىتتا ەلدەر اراسىنداعى اقپاراتتىق ءوزارا ءىس- قيمىلدى دامىتۋدىڭ باسىمدىقتارىن ايقىندايتىن ستراتەگيالىق قۇجات — استانا كونسەنسۋسى قابىلداندى. بۇل قۇجات ايماقتىق سيفرلىق، اقپاراتتىق جانە IT سالاسىنداعى ءوزارا ءىس- قيمىلدىڭ نەگىزىنە اينالدى جانە ورتالىق ازيا مەملەكەتتەرى مەن قىتاي حالىق رەسپۋبليكاسى اراسىنداعى ۇزاق مەرزىمدى ىنتىماقتاستىقتىڭ نەگىزگى باسىمدىقتارىن بەلگىلەيدى.
قىتايلىق ب ا ق- پەن ءوزارا ءىس-قيمىلدى دامىتۋ — پرەزيدەنت ت ر ك- نىڭ ازيا ەلدەرىندە ءبىرىڭعاي سەرىكتەستىك جەلىسىن قۇرۋ باعدارلاماسىنىڭ ءبىر بولىگى بولىپ تابىلادى. قازىرگى ۋاقىتتا ىنتىماقتاستىق تۋرالى كەلىسىمدەر جاپونيا، كورەيا، ۆەتنام، ءۇندىستان، پاكىستان جانە ەۋرازيانىڭ باسقا دا ەلدەرىنىڭ مەدياكومپانيالارىن قامتيدى.
