پرەزيدەنت: «تازا قازاقستان» اكسياسى جالپىۇلتتىق يدەولوگياعا اينالىپ كەلەدى
استانا. KAZINFORM - قاسىم-جومارت توقايەۆ COP17 اياسىنداعى بيوالۋانتۇرلىلىك بويىنشا كوشباسشىلار سامميتىندە ءسوز سويلەپ، جەر كولەمى بويىنشا الەمدە توعىزىنشى ورىن الاتىن قازاقستان بىرەگەي بيوالۋانتۇرلىلىگىمەن ەرەكشەلەنەتىنىن ايتتى، دەپ حابارلايدى اقوردانىڭ باسپا ءسوز قىزمەتى.
- تابيعاتتىڭ وسى سىيىن ساقتاۋ - جۇرت الدىنداعى بورىشىمىز، سونداي-اق حالىقارالىق قوعامداستىق الدىنداعى جاۋاپكەرشىلىگىمىز. بۇل قۇندىلىقتار قازاقستاننىڭ جاڭا كونستيتۋتسياسىندا ايقىن كورىنىس تاپتى. ەل تاريحىندا العاش رەت جوعارى ەكولوگيالىق مادەنيەت قالىپتاستىرۋ مەملەكەتتىلىكتىڭ نەگىزىن قۇرايتىن قاعيداتتاردىڭ ءبىرى رەتىندە اتا زاڭىمىزدا بەكىتىلدى. ەندى ازاماتتار تابيعات پەن ونىڭ رەسۋرستارىن كوزىنىڭ قاراشىعىنداي ساقتاۋعا مىندەتتى. بۇدان بولەك، ازاماتتاردىڭ ءومىرى مەن دەنساۋلىعى ءۇشىن قولايلى قورشاعان ورتانى قورعاۋ مەملەكەتتىڭ ماڭىزدى ماقساتتارىنىڭ ءبىرى رەتىندە بەلگىلەندى. تابيعات بايلىعىن ساقتاۋ ەكونوميكالىق ورلەۋمەن قاتار ءجۇرۋى كەرەك ەكەنىنە سەنىمدىمىز. «تازا قازاقستان» جالپىۇلتتىق اكسياسى وسى قۇندىلىقتاردى ارقاۋ ەتكەن. بۇل قوزعالىس قاراپايىم ەكولوگيالىق تازالىق اۋقىمىنان شىعىپ كەتتى. ونىڭ ازاماتتاردىڭ دۇنيەتانىمى مەن ءومىر سالتىنا ىقپال ەتەتىن جالپىۇلتتىق يدەولوگياعا اينالىپ كەلە جاتقانى قۋانتادى، - دەدى پرەزيدەنت.
بۇعان دەيىن پرەزيدەنت قاسىم-جومارت توقايەۆ COP17 اياسىنداعى بيوالۋانتۇرلىلىك بويىنشا كوشباسشىلار سامميتىنە قاتىسۋ ءۇشىن ەريەۆانداعى «Meridian Expo and Event» ورتالىعىنا بارعانىن جازعان ەدىك.
