پرەزيدەنت ت م د ەلدەرىنىڭ ادامداردى ىزدەستىرۋ شارتىنا قاتىستى زاڭعا قول قويدى
استانا. KAZINFORM - مەملەكەت باسشىسى «2010 -جىلعى 10-جەلتوقسانداعى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ ادامداردى مەملەكەتارالىق ىزدەستىرۋ تۋرالى شارتىنا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.
بۇل تۋرالى اقوردانىڭ باسپا ءسوز قىزمەتى حابارلادى.
ىشكى ىستەر ءمينيسترىنىڭ ورىنباسارى سانجار ءادىلوۆتىڭ ايتۋىنشا، حاتتامامەن شارتقا ت م د مەملەكەتتەرىنىڭ قۇزىرەتتى ورگاندارى اراسىندا ەلەكتروندىق فورماتتا اقپارات الماسۋدى رەگلامەنتتەيتىن وزگەرىستەر ەنگىزۋ كوزدەلگەن. بۇل رەتتە شارتقا قاتىسۋشى ەلدەردىڭ قۇقىق قورعاۋ ورگاندارى ادامداردى مەملەكەتارالىق ىزدەستىرۋگە قاتىستى قۇجاتتارمەن الماسۋ ماقساتىندا ۆەدومستۆولىق ەلەكتروندىق پوشتا سەرۆەرلەرىن پايدالانادى.
- ادامداردى مەملەكەتارالىق ىزدەۋ تۋرالى شارت ءبىزدىڭ ەلىمىزگە شەتەلدە قىلمىستىق قۋدالاۋدان نەمەسە سوت ۇكىمىن ورىنداۋدان جاسىرىنىپ جۇرگەن ادامداردى ءتيىمدى ىزدەۋ ءۇشىن قاجەت. شارت اياسىندا ءبىز ىزدەۋدەگى ادامداردىڭ جۇرگەن جەرىن انىقتاۋ جانە ولاردى بەلگىلەنگەن تارتىپپەن بەرۋ ماسەلەلەرى بويىنشا اقپاراتپەن الماسامىز. كوپتەگەن جىل بويى وسى شارت اياسىندا جۇيەلى جۇمىس جۇرگىزىلىپ كەلەدى. ونىڭ ناتيجەسىندە كوپتەگەن وڭ پراكتيكالىق ناتيجەلەرگە قول جەتكىزىلدى. ونىڭ ەلىمىز ءۇشىن پايداسى - وسىنداي ادامداردى ىزدەستىرۋدىڭ تيىمدىلىگىن ارتتىرۋ جانە ولاردى جاۋاپقا تارتۋدى قامتاماسىز ەتۋ. بۇگىنگى كۇندە ءبىزدىڭ ەلدەن باسقا بارلىق مەملەكەتتە حاتتاما راتيفيكاتسيالانعان، - دەدى ول.
وسىعان دەيىن پرەزيدەنت قىلمىستىق ىستەر بويىنشا قۇقىقتىق كومەك تۋرالى زاڭعا قول قويدى.
