پرەزيدەنت: ستراتەگيالىق جوسپارلارعا ۇلت بىرلىگى جانە قوعامنىڭ الەۋمەتتىك ىرگەتاسى جەتكىزەدى

ونىڭ سوزىنشە، ەلىمىز جاڭا تاريحي كەزەڭگە قادام باسا وتىرىپ، بۇكىل ازاماتتىق ينفراقۇرىلىمدى سالۋ مەن جاڭعىرتۋعا كىرىسىپ جاتىر. الداعى بىرنەشە جىلدا قۇرىلىس قارقىنى رەسپۋبليكانىڭ بارلىق ءوڭىرىن قامتيدى.

- ءبىز اۆتوموبيل جولدارىن، ونەركاسىپتىك جانە ەنەرگەتيكالىق نىسانداردى، تەمىرجولداردى، كوپىرلەردى، ينجەنەرلىك جەلىلەردى، گيدروتەحنيكالىق قۇرىلىستاردى، مەكتەپتەردى، اۋرۋحانالاردى، سپورت كەشەندەرىن جانە، ارينە، مادەنيەت نىساندارىن سالامىز. زاماناۋي ينفراقۇرىلىم سالۋ ونداعان جاڭا ءوندىرىس ورنىن اشۋمەن جانە، ەڭ باستىسى، حالىق يگىلىگىنە باعىتتالعان تسيفرلىق ەكونوميكانى دامىتۋمەن تىعىز بايلانىستى. وسىلايشا، ءتارتىپ، جاۋاپكەرشىلىك پەن تاباندى ەڭبەكتىڭ ارقاسىندا ءبىز تاياۋ ۋاقىتتا اۋىلدارىمىز بەن قالالارىمىزدىڭ كەلبەتىن تۇبەگەيلى وزگەرتەمىز. ورتاق ءۇيىمىز - قازاقستان رەسپۋبليكاسىن اناعۇرلىم قۋاتتى ءارى تارتىمدى مەملەكەتكە اينالدىرامىز. «زاڭ مەن ءتارتىپ» قاعيداتىن باسشىلىققا الىپ، ار-ۇجدانىمىز اياسىندا ەڭبەك ەتسەك، الدىمىزعا قويعان بارلىق ماقساتقا مىندەتتى تۇردە جەتىپ، ۇرپاقتارىمىزعا لايىقتى مۇرا قالدىرامىز، - دەدى پرەزيدەنت.

مەملەكەت باسشىسى تاعى ءبىر مارتە ۇلت بىرلىگىن، قوعامنىڭ الەۋمەتتىك ىرگەتاستى نىعايتۋ كەرەك ەكەندىگىن ايتتى.

- بۇرىن-سوڭدى بولماعان جاھاندىق سىن-قاتەرلەر جاعدايىندا ءبىز ۇلت بىرلىگىن، قوعامنىڭ الەۋمەتتىك ىرگەتاسىن جان-جاقتى نىعايتۋىمىز كەرەك. ستراتەگيالىق وي-نيەتتەرىمىز بەن جوسپارلارىمىزدىڭ تۇپكىلىكتى تابىسقا جەتۋىنىڭ كەپىلى - ءدال وسى. وسى جولدى ۇستانساق، قازاقستان الەمدىك وركەنيەتتىڭ الدىڭعى قاتارىنان لايىقتى ورىن الاتىنىنا سەنىمدىمىن، - دەدى ول.

ايتا كەتەيىك، بۇعان دەيىن پرەزيدەنت ينكليۋزيۆتى ءبىلىم الۋعا ءتيىس 237 مىڭ بالا بار ەكەنىن مالىمدەپ، ينفراقۇرىلىمدى دامىتۋدى تاپسىردى.